Сылын аайы биһиги оскуолабыт оҕолоро нэһилиэкпит аҕам саастаах дьонноругар үтүө үгэһи тутуһан, тиһигин быспакка, тимуровскай көмө оҥороллор. Күһүҥҥү сылаас күннэри тутуһан, кыстыкка бэлэмнэнии, дьиэ хаһаайыстыбатын үлэтэ киһи сааһырдаҕын аайы кыайтарбата элбээн иһэр.
Ол курдук, бу үөрэх дьылын саҕаланыыта «Бастыҥнар хамсааһыннарын» былаанынан, «Орто Амма Кэскилэ» түмсүү актыбыыстара, 7-с уонна 8-с кылаас оҕолоро, кылаас салайааччылара Ксения Владимировна Григорьева уонна Вероника Самуиловна Петрова салайыыларынан нэһилиэкпит олохтоохторугар уонна оскуолабыт бэтэрээн учууталларыгар дьиэ ис-тас үлэтигэр күүс-көмө буоллулар. 8 кылаас үөрэнээччилэрэ уонна 7 кылаас кыргыттара оскуолабытыгар өр сылларга библиотекарынан үлэлээбит оскуола бэтэрээнигэр Зоя Николаевна Даниловаҕа хортуоска хостооһунугар көмөлөстүлэр.
Онтон 7 кылаас уолаттара оскуолабыт бэтэрээн учууталыгар, билигин оскуола түмэлин салайааччытыгар Валентина Викторовна Блахироваҕа дьиэ ис-тас үлэтигэр көмө оҥордулар. Ол курдук, дьиэ муостатын анныгар биэдэрэнэн буор куттулар, сорох уолаттар дьиэҕэ уу тастылар. Ону тэҥэ дьиэ таһыгар оҕуруот үлэтигэр эмиэ көмөлөстүлэр. Үлэлээбит оҕолорго бэтэрээннэрбит махталларын тиэрдэллэр, кэлэн көмөлөспүттэригэр олуһун диэн үөрдүлэр.
Дьэ бу курдук, оҕолорбут сылын аайы нэһилиэкпит аҕам саастаах кырдьаҕас дьонноругар күүс-көмө буолаллар, болҕомтолоох сыһыаннаһаллар. Кырдьаҕас көлүөнэҕэ ытыктыыр, көрөр-харайар үгэһи ыһыктыбаппыт. Сылын аайы тимуровскай үлэ чэрчитинэн оскуолабытыгар былааннаах үлэ ыытыллар. Тимуровскай хамсааһын оҕолору үлэҕэ үөрэтэр, үтүөҕэ көҕүлүүр, кырдьаҕаска болҕомтолоох буолууну иитэр.
Оҕону үлэнэн иитии
Балаҕан ыйын 12 күнүгэр Н.Е. Мординов-Амма Аччыгыйын аатынан Харбалаахтааҕы үөрэхтээһин холбоһугун улахан сүһүөх 10-11 кылаас оҕолоро, 11 кылаас салайааччыта Кэрэчээнэ Егоровна Терентьева салайан чугас сытар Чымнаайы нэһилиэгэр бааһынай хаһаайыстыбалаах дьиэ-кэргэҥҥэ хортуоска хостооһунугар субуотунньукка сырыттылар. Бу күн күммүт туран биэрэн, оҕолор 182 куулу хостоон, оскуолаларын буфетыгар кыстыгы туоруур хортуоскаларын булан, бэйэлэрэ да үөрдүлэр. Ол курдук сылын аайы биһиги холбоһукпут оҕолоро хортуоска субуотунньугар өрүү сылдьаллар. Урукку көлүөнэ оҕолорун, эбээлэрин-эһээлэрин, холобурдарынан, билиҥҥи да көлүөнэ оҕолоро итинник субуотунньуктарга үөрүүнэн кытталлар, үлэ үөрүйэхтэрин иҥэринэллэр.
Ити курдук, оскуолаҕа үлэнэн иитии тиһигин быспакка ыытыллар. Инниктин даҕаны субуотунньуктар, тимуровскай үлэлэр баар буолуохтара.
В.В. Макарова, дириэктэри иитэр үлэҕэ слобуйааччы.
keskil14.ru