Балаҕан ыйын 1 күнэ — Арассыыйаҕа Билии бырааһынньыга. Бу күн, 1984 сыллаахха, бэс ыйын 15 күнүгэр Верховнай Совет Президиумун ыйааҕынан ылыныллыбыта. 2025-2026 үөрэх дьылын Үөһээ Бүлүү улууһун Дүллүкү орто оскуолата 143 үөрэнээччилээх көрсөр. Сайын устата оҕолор сынньанан, саҥалыы санаа, күүс эбинэн үөрэнэ кэллибит.
Быйыл оскуолабытыгар 13 саҥа үөрэнээччи 1-кы кылааска киирэн билии-көрүү аартыгар үктэннэ. Кинилэри маҥнайгы учууталлара Саргылана Петровна Санникова эҕэрдэлии көрүстэ. Оттон 9 кылааска 13 оҕо (9 уол, 4 кыыс), 11 кылааска 8 оҕо ( 1 уол, 7 кыыс) үөрэнэн, сүрүн уонна биир кэлим эксээмэни туттарыа. Оскуола дириэктэрэ Тихон Александрович Егоров эҕэрдэтин тиэртэ:
Ааспыт үөрэх сылыгар Бүтүн Арассыыйатааҕы таһымнаах күрэхтэргэ тиийэ биһиги оҕолорбут ситиһиилээхтик кытыннылар, өрөспүүбүлүкэбитин, улууспутун, нэһилиэкпитин үрдүк таһымҥа ааттаттылар. Үүммүт үөрэх сылыгар хас биирдии үөрэнээччигэ, учууталга, төрөппүттэргэ өссө үрдүк ситиһиилэри баҕарабын!
Салгыы нэһилиэк баһылыга Николай Петрович Романов эҕэрдэлээтэ уонна 1-кылаастарга бэлэхтэри туттарда.
Быйыл оскуолабытыгар анал үөрэҕи бүтэрэн физкультура учууталынан үлэлии кэлбит Аркадий Григорьевич Лазаревы көрсөн кэпсэттибит:
-2020 сыллаахха Дүллүкү орто оскуолатын үөрэнэн бүтэрбитим. Онтон кыра массыынаны ыытар быраабы ылаарыбын, Автодорожнай техникумҥа механик идэтигэр 10 ый үөрэммитим. Ол кэннэ Хабаровскайдааҕы байыаннай чааска сулууспалаабытым. Кэлэн баран Бүлүүтээҕи педкэллиэскэ физкультура салаатыгар үөрэнэ киирбитим. Оскуолаҕа 4-с кылаастан атах оонньуутунан дьарыктаммытым. Онно физкультура учуутала Сардана Тусаховна Герасимова чэпчэки атлетикаҕа сыһыарбыта. Үрдүкү кылааска тахсан баран биирдэ ситиһиилэммитим. Улуус, регион, республика күрэхтэһиилэригэр миэстэлэспитим. Национальнай многоборьеҕа, уһун дистанцияҕа сүүрүүгэ чемпион, призер буолбутум. Спордунан дьарыктанарбын сөбүлээбитим. Онтон сиэттэрэн физкультура салаатыгар туттарсарга санаммытым. 5 сыл буолан баран, үөрэммитим оскуолабар чэпчэки атлетиканы сайыннараары, билигин олус сэҥээриллэр, сайдан эрэр көрүҥү хотугу многоборьены киллэрээри учууталбын солбуйан үлэлии кэллим.
Үөрэх дьыла саҕаламмытынан Бүтүн Арассыыйатааҕы «Ты — супер» ырыа куонкуруһун кыттыылааҕа, «Хатан» ВИА солиһа Владимир Климовскай үөрэммит оскуолатын оҕолорун, учууталларын гитараҕа ырыанан эҕэрдэлээтэ. Онтон биһиги бырааһынньыкка кэлбит күндү учууталларбытыгар сибэкки дьөрбөтүн бэлэхтээн үөртүбүт.
Саҥа үөрэх дьылыгар оҕолорго, учууталларбытыгар үөрэххэ дьулууру, спорка, бары эйгэҕэ ситиһиилэри баҕарабыт!
Айыына ПЕТРОВА, IX кылаас,
» Эрчим» медиакиин, Дүллүкү, Үөһээ Бүлүү