От ыйын 8 күнүгэр Таатта улууһун Ытык Күөл сэлиэнньэтигэр саҥа арыллыбыт «Дьулуруйар Ньургун Боотур» стадиоҥҥа күрэс төрүт көрүҥнэригэр XXII-с «Манчаары оонньууларын» үөрүүлээх арыллыытын өрөгөйдөөх хаамыыта тыһыынчанан күрэсчити муста. Ытык Таатта олохтоохторо, ыалдьыттара Саха сирин араас улуустарыттан мустубут күрэсчиттэри үрдүк таһымҥа көрүстүлэр.
Күрэсчиттэр өрөгөй хаамыыларын бас судьуйа Николай Цыпандин салайааччылаах судьуйалар холбоһуктаах бөлөҕө арыйда. Кинилэр кэннилэриттэн күрэс бэтэрээннэрэ, ону таһынан урукку-хойукку «Манчаары оонньууларын» кыттыылаахтара кыттыыны ыллылар. Онтон хас биирдии улуус делегацията сомоҕолуур биир таҥастаах, улууһун көрдөрөр былаахтаах, улуус баһылыга сирдээччилээх өрөгөйдөөх хаамыыга киирдилэр. Элбэх күрэсчиттэр Амма, Уус Алдан, Хаҥалас, Горнай, Үөһээ Дьааҥы, Чурапчы уо.д.а. улуустарыттан мустубуттарын бэлиэтиибит. Маны таһынан, ыраах Нерюнгри, Мииринэй, Эбээн Бытантай, Эдьигээн курдук сирдэртэн күрэһи сэҥээрээччилэр Таатта сиригэр-уотугар үктэммиттэрин хайгыы көрдүбүт.
Быйыл күрэс төрүт көрүҥнэригэр уопсайа барыта 35 хамаанда, 1772 күрэсчит уонна 516 делегация кыттыыны ылаллар. Өрөгөйдөөх хаамыы этэҥҥэ барарын 205 үтүө көмөһүт үлэтэ кэтээтэ, сирдээн биэрдэ.
Хас биирдии күрэсчит хараҕын уота бу өрөгөй хаамыытыгар умайда. Улуустарын ааттатар улахан чиэс, сыралаах үлэ түмүгэ, кыайыыга дьулуур, бэйэҕэ эрэл, успуортка таптал — бу барыта быйылгы күрэс төрүт көрүҥнэригэр XXII-с «Манчаары оонньуулара». История мантан саҕаланар!
Сиһилии видео-матырыйаалбытыгар көрүҥ:
Суруйда Мария Сибирякова, С.К. Макаров аатынан Чурапчы гимназиятын 11 кылааһын үөрэнээччитэ, видеоҕа уһулла Дарина Иванова, Хаптаҕай орто оскуолатын 9 кылааһын үөрэнээччитэ, «Кэскил» оҕо медиа киинин эдэр кэрэспэдьиэннэрэ