Бэс ыйын 27 күнүгэр СӨ Национальнай бибилэтиэкэтин Историческай саалатыгар татаар норуодунай бэйиэтэ, Татарстан Суруйааччыларын сойууһун бэрэссэдээтэлэ, Судаарыстыбаннай мунньах депутата, тылбаасчыт, суруналыыс, литературнай кириитик, публицист Ркаиль Рафаилович Зайдуллин – Ркаил Зайдулла «Сабантуй» кинигэтин сүрэхтэниитэ буолан ааста.
Санатан эттэххэ, икки доҕордуу норуот чугас сыһыанын бигэргэтэр XXV Федеральнай Сабантуй бу ый 13-14 күннэригэр Саха сирин киин куоратыгар ыытыллыбыта.
Үөрүүлээх киэһэни Саха сирин суруйааччыларын сойууһун бэрэссэдээтэлэ Н.И. Харлампьева иилээн-саҕалаан ыытта.
Кинигэ сүрэхтэниитигэр кыттыыны ыла, санааларын үллэстэ үгүс киһи ыалдьыттаата. Ол курдук, Ил Түмэн бэрэссэдээтэлин солбуйааччы А.С. Владимиров икки түүрдүү төрүттээх өрөспүүбүлүкэ доҕордуу сыһыаннарыгар сүдү кылааттарын иһин Ркаиль Рафаилович Зайдуллиҥҥа уонна кинигэни сахалыы тылбаастаабыт Данил Николаевич Макеевка махтал суругу туттарда. Норуодунай суруйааччылар Николай Лугинов уонна Семен Попов – Сэмэн Тумат үөлээннээхтэрин, биир идэлээхтэрин, күндү доҕордорун эҕэрдэлээтилэр, үтүө тылларын эттилэр, үөрүүлэрин үллэһиннилэр. «Чолбон» сурунаал сүрүн эрэдээктэрэ, публицист, кириитик Г.Г. Андросов кинигэ сүрэхтэниитинэн эҕэрдэлээн туран, литератулар доҕордоһуулара сүдү суолталааҕын бэлиэтээтэ уонна үөрүүлээх быһыыга-майгыга махтал суругу кытары сэмэй бэлэх туттарда.
Оттон Татарстан өрөспүүбүлүкэтиттэн тутуу уонна олохтоох бэйэни салайыныы Судаарыстыбаннай Сүбэ кэмитиэтин бэрэссэдээтэлэ А.Г. Хабибуллин, «Туган як» культурнай киин Саха сиринээҕи уопсастыбаннай тэрилтэ бэрэссэдээтэлэ И.Н. Халилов кэлэн ыалдьыттаатылар.
Үөрүүлээх киэһэни Татарстан өрөспүүбүлүкэтин култууратын үтүөлээх үлэһитэ Т.Х. Хуснутдинов уонна И.Е. Стрекаловская салайааччылаах «Ямские бубенцы» ансаамбыл эҕэрдэ нүөмэрдэринэн киэргэттилэр.
«Сабантуй» кинигэни сахалыы Д.Н. Макеев тылбаастаата. Санатан эттэххэ, кини «Ат хараҕа» уонна «Муус чопчу» кэпсээннэрэ татаар тылынан саҥарбыттара уонна «Казан утлары» сурунаалга бэчээттэммиттэрэ.
Д.Н. Макеев тылбаас туһунан санаатын үллэстэр: «Бэйэм бэчээт эйгэтигэр үлэлээбитим 35 сыла буолла. Кэнники «Чолбон» сурунаалга үлэлии киирэн, литературнай тылбааһынан дьарыктанан барбытым. Аҕа табаарыстарым Урсун, Сэмэн Тумат “тылбаастарыҥ үчүгэйдэр, салгыы тылбаастаан ис” диэбиттэриттэн санаам өссө ордук көтөҕүллүбүтэ. Бэйэм оҕолорго аналлаах кэпсээннэрдээхпин, сэһэннэрдээхпин, онон улахан ыарахаттары көрсүбэтэҕим. Бу кинигэни 3 күнүнэн тылбаастаан бүтэрбитим». Ону таһынан инникитин өссө да бииргэ үлэлэһэр баҕалааҕын биллэрдэ.
Ааптар Ркаил Зайдулла кыра эрээри, сүдү суолталаах «Сабантуй» кинигэ сүрэхтэниитигэр кэлбит ыалдьыттарга, тэрийээччилэргэ үөрэн, долгуйан туран махталын биллэрдэ. Ханнык баҕарар литератураҕа оҕо сүрэҕин сүүйэр уустугун уонна ураты дьоҕуру ирдиирин бэлиэтээтэ.
Бэлиэ тэрээһин Н.И. Харлампьева Ркаил Зайдуллаҕа анаабыт хоһоонун ааҕыытынан түмүктэннэ.
Олеся Слепцова
keskil14.ru