Бүгүн, бэс ыйын 5 күнүгэр, ытык сиргэ «Арчы дьиэтэ» духуобунай кииҥҥэ «Спортивные Якутяне» Cаха өрөспүүбүлүкэтин үөрэнээччилэрин спартакиадатын уотун уматыы сиэрэ-туома ыытылынна.
Бэлиэ түгэҥҥэ Саха сирин араас улуустарыттан кэлбит спортсменнар муһуннулар. Бүгүҥҥү оонньуу уотун саҕар сүдү түһүлгэҕэ мааныылаах ыалдьытынан буоллулар:
- CӨ үөрэҕин уонна наукатын миниистирэ Соколова Нюргуна Афанасьевна;
- CӨ физическэй культураҕа уонна спорка миниистирэ Спиридонов Николаевич;
- «Юные якутяне» өрөспүүбүлүкэтээҕи ресурс киинин дириэктэрэ Соловьев Айал Михайлович.
Ыалдьыттары уонна спартакиада кыттааччыларын сахалыы сиэринэн алаадьылаах, үтүө алгыс тыллаах көрүстүлэр. Эҕэрдэ тылы CӨ үөрэҕин уонна наукатын миниистирэ Соколова Нюргуна Афанасьевна эттэ:
3 сыллааҕыта Сергей Васильевич Местников, тэрийэр бөлөх министерствота, спорт министерствота өйөөннөр оҕолорбут, ыччаттарбыт спартакиадалара саҕаланан тэриллибитэ наһаа үөрүүлэх түгэн дии саныыбын. Быйыл биһиги 3-с сылын кыттабыт. Барыта 29 көрүҥ буолла. Бу манна бастыыр иһин күрэхтэргэ, чемпионаттарга биһиги үөрэнээччилэрбит көхтөөхтүк кыттаннар өрөспүүбүлүкэтээҕи спартакиада маассабай көрүҥнэригэр бэйэлэрин миэстэлэрин булан тураллар. Биһиги өрөспүүбүлүкэбит хас биирдии муннугуттан кыттыылаахтар бааллар. Ол үөрдэр. Үөрэх процеһа бара турар, оҕолор ЕГЭ, ОГЭ туттара сылдьаллар. Ону улахан кыһалҕа оҥорбокко, хотуттан, тэйиичи сытар улуустартан тэрийээччилэр кэлэннэр үлэлии сылдьаллар. Маннык тэрээһиннэр оҕолорбут бэйэлэрин сайдыыларыгар, эттэрэ-сииннэрэ, өйдөрө сайдылларыгар туһалаах. Онон хас биирдии кыттааччыга баҕарым этэ бастатан туран, доруобуйаны уонна ситиһиилэри. Хас биирдиигит бу күрэххэ кыттыһаҥҥыт кыайыыны эрэ буолбакка, бэйэ бэйэҕитин кытта доҕордоһон уонна күүскүтүн, өйгүтүн тэҥнээн көрөҥҥүт өссө да улахан чыпчаалларга тахсаргытыгар баҕарабын!
Салгыы эҕэрдэ тылы CӨ физическэй культураҕа уонна спорка миниистирэ Спиридонов Леонид Николаевич маннык эттэ:
Бастакы Президеммит Михаил Ефимович Николаев этэн турар ханнык баҕар омукка, дойдуга эдэр ыччакка аналлаах күрэхтэһии тирэх буолуоҕа диэн. Бүгүн Сахабыт сирин инникилэрэ кэлэн тураҕыт. Ону өйдөөн туран, бу былырыын «Азия оҕолорун» оонньууларыгар Саха сирин оҕолоро бэркэ кыттаннар, үрдүк ситиһиилэри көрдөрбүттэрэ. Хас да сыл тохтобул кэнниттэн оҕо спартакиадатын Ил дархаммыт Айсен Сергеевич Николаев этиитинэн сөргүтүллэн үһүс төгүлүн ыытыллар. Сыл сылтан кыттааччы элбээн иһэр. Уот уматыллан, киэһэ салгыы 19:00 чааска спартакиада аһыллыыта буолуоҕа. СӨ физическай культураҕа уонна спорка министерстоватын аатыттан үөрэҕэрии миннистерствотыгар, тэрийээччилэргэ махталбын тиэрдэбин. Сүрдээх үчүгэй спорт быааһынньыга саҕаламмытынан!
Өбүгэ саҕаттан быччыҥнаах, күүстээх, кыахтаах хоһууттарын алгыс тылынан алҕаан, Аал уокка сүгүрүйэн, куттарын-сүрдэрин бөҕөргөтөллөрө. Бүгүҥҥү бэлиэ түгэҥҥэ алгысчыт ыалдьыттара аал-уоттан оттон, алгыс тыллары этэн арчылаата.
Спартакиада оонньуулларын саҕыллыбыт мэҥэ уотун алгысчыт Вероника Федороваҕа туттарда. Вероника Федорова — Хаҥалас улууһун 2-с Малдьаҕар орто оскуолатын 10 кылааһын үөрэээччитэ, мас-рестлиҥҥэ Арассыыйа икки төгүллээх чемпиона.
Вероника Федорова санаатын биһиэхэ маннык үллэһиннэ:
«Олус долгутуулаах уонна эппиэтинэстээх түгэн буолла. Мас тардыыһынан 14 сааспыттан дьарыктанабын. Мас-рестлиҥҥэ Арассыыйа икки төгүллээх чемпиона, Саха сирин 4 төгүллээх чөмпүөйэнэ буолабын.Тренерым Уваров Ньургун Александрович. Бэйэм спартакиадаҕа кыттабын. Бүгүн ыйааһыннаныы буолар, сарсын күрэхтэһэбин. Күрэххэ бэлэммин дии саныыбын»
Уот салгыы Н.Н. Тарскай аатынан стадиоҥҥа айаннаата. Cаха өрөспүүбүлүкэтин үөрэнээччилэрин спартакиадатын үөрүүлээх арыллыыта бүгүн Н. Тарскай аатынан стадиоҥҥа киэһэ 19:00 чааска буолуоҕа.
Бу үөрүүлээх күн оҕо сатабылын сайыннарар, чөл, чэгиэн олоҕу чэлгитэр сыаллаах оонньуу киэҥ эйгэлээх тэрээһинэ сайдыы суолун түстээн, ситиһиилэри, үөрүүлээх түгэннэри аҕаллын! Бүгүҥҥү бэлиэ күн, үтүө алгыс кыттааччыларга күүһү-уоҕу, эрчими, күүстээх санааны бэлэхтээтин.
keskil14.ru