Хос эбэм Анастасия Егоровна Пестерева 1920 с. Амма улууһун Эмис нэһилиэгэр биэс оҕолоох Егор Дмитриевич, Евдокия Филипповна Пестеревтар дьиэ кэргэттэригэр «2-с Пятилетка» колхуос киинигэр Ураһалаах алааска төрөөбүтэ.
Биэс бииргэ төрөөбүт Бөстүрүөптэр барыларын дьылҕата Аҕа дойду Улуу сэриитин ыар сылларын кытта сибээстээх. Улахан убайдара Бүөккэ үлэ фронугар сылдьыбыт. Иккис убайа Өлөксөй Аҕа дойду Улуу сэриитин кыттыылааҕа. Балтылара Өрүүнэ, Евдокия сэрии ыар сылларыгар үлэ ыараханын сүкпүттэрэ.
Хос эбэм Настаа сэрии сылларыгар 20-лээх эдэркээн кыыс эбит. «2-с Пятилетка» колхуоска тыһыынчаттан тахса түүтэҕи баайар хамсаныылаах, кыахтаах кыыс этэ диэн кэпсииллэр. Ол да иһин Тымтыктай диэн ааттыыллар эбит. Сэрии кэмигэр колхуос күүстээх, иҥиирдээх кыргыттарын Ааллаах Үүҥҥэ таһаҕас таһыытыгар ыыталлара. Хос эбэм онно талыллан, ат көлөнөн таһаҕас таһыытыгар сылдьыбыт.
Сэтинньи ыйга турунан баран, саас хаар ууллуута биирдэ дойдуларын булаллар эбит. Ол тухары наар айан, тоҥуу-хатыы.
Аһаҕас халлаан анныгар хаар үрдүгэр хонон тураллара. Көмүс бириискэлэригэр биир да таһаҕаһы энчирэппэккэ, сэрии кэмигэр туруоруллубут уустук соруктарын толороллоро.
– Ыраах айаҥҥа таҥаһын дуомун бэлэмниирбитин өйдүүбүн. Ампаарга эдьиийим Ааллаах Үүҥҥэ барарыгар кэтэр түнэ этэрбэһэ, истээх сон дуома, уһун мас түүтэ саҕалаах ырбаахы кичэллик ууруллан турар буолара. Ону киллэрэн абырахтаан, ыпсаран биэрэрбит. Билигин Ааллаах Үүҥҥэ сылдьыбыттарын туһунан салла ааҕабын. Итиччэлээх уустук айаны хайдах тулуйан сылдьаахтаабыта буоллар. Сырыы, айан туһунан кэпсээбэт этэ, – диэн кэпсиир бииргэ төрөөбүт балта, тыыл бэтэрээнэ, 90 саастаах Евдокия Егоровна Пестерева.
Сайаана СОЛДАТОВА, Х «А» кылаас,
В.Г. Короленко аатынан Амма 1 №-дээх орто оскуолата