Бүгүн, муус устар 10 күнүгэр Өрөспүүбүлүкэтээҕи медиа-кииҥҥэ «Басхан – 2025» түмүктүүр түһүмэҕэ буолан ааста. Мөккүөр түһүмэх тиэмэтэ:
Тыа хаһаайыстыбатыгар ыччаты сыһыарыы: төрүт дьарыгы тутан хааларбыт сайдыыга тиэрдиэ дуо?
Өй-санаа лиидэрдэрэ дэнэр, сахабыт норуотун, дойдубут кэскилин түстэhэр сыалга-сорукка туруммут уоланнар мөккүөр түһүлгэтигэр күөн көрүстүлэр.
Быйылгы оонньууга 12 улуустан: Горнайтан, Мэҥэ-Хаҥаластан, Томпоттон, Намтан, Хаҥаластан, Бүлүүттэн, Сунтаартан, Кэбээйиттэн, Амматтан, Чурапчыттан, Үөһээ Бүлүүттэн уонна Дьокуускайтан уопсайа 20 басхан уол илин-кэлин түсүһүөхтэрэ, түмүгэр бастыҥнар ааттаныахтара.
Руфов Алексей Васильевич, басхан дьүллүүр сүбэ бэрэдсэдээтэлэ:
Оҕолор билиилэрин-көрүүлэрин анализтаан көрөбүн. Оҕолор туруктара, бастакы түһүмэххэ олох чаҕылхай этилэр. Онтон иккис уонна үһүс түһүмэхтэргэ арыый аҕай ыарахан буолла быһыылаах. Блиц ыйытыыларга оҕолор ыарырҕаппыттара, долгуйбуттара даҕаны. Дебатка оҕолор бэйэлэрин олус үчүгэйдик көрдөрдүлэр. Саҥаран баран кэлээр диэбит оҕолор бааллар. Устар ууну сомоҕолуур тыллаах киһи, хаһан баҕарар, ханнык баҕарар эйгэҕэ, бэйэтин талан ылбыт идэтигэр ситиһиилээх буолар. Мин манна сорох уолаттары көрөн аһардым, урут биһиэхэ басхаҥҥа кыайбыт, басхаҥҥа сылдьыбыт уолаттар кэлэн бардылар. Олор билигин таһымнары үрдүгэ сүрдээх. Дьүллүүр сүбэҕэ олордулар. Билиилэрэ-көрүүлэрэ, ыйытыылара, киһи уопсайынан астынар уонна киэн туттар.
Адамов Александр, Амма улууһун Алтан нэһилиэгэ:
Басхан күрэх уопсайынан, олус интэриэһинэй диэн этиэххэ наада. Хас биирдии кыттааччы бары кыайыыга дьулуурдаах уолаттар эбит. Бу түһүмэх үс чааһы быһа буолла. Киһи тулуйарыгар өй-мэйии, эт-хаан өттүнэн бэлэм буолуохха наада эбит. Оннуотунан уустуктаах эбит. Мин өрөспүүбүлүкэҕэ бастакыбын кытынным. Улууска син кыттааччым.
Финал түмүктүүр чааһыгар наҕараадалааһын:
Добун сурук иккис үрдэл кыайыылааҕа: Боронов Иннокентий Аяновичка, Тоҕус орто оскуолатын 10 кылааһын үөрэнээччитэ, Бүлүү улууһа.
Добун сурук бастакы үрдэл кыайыылааҕа: Иванов Ярослав Ильич, Василий Васильевич Филиппов аатынан Бэрдигэстээх улуустааҕы гимназиятын 10 кылааһын үөрэнээччитэ, Горнай улууһа
Кылаан чыпчаал кыайыылааҕа: Адамов Александ Егорович, Екатерина Семеновна Никитина аатынан Алтан орто оскуолатын 11 кылааһын үөрэнээччитэ, Амма улууһа.
keskil14.ru