В.П. Ларионов аатынан «Инникигэ хардыы» XXIX эдэр чинчийээччилэр өрөспүүбүлүкэтээҕи научнай конференциялара түмүктэннэ. “Инникигэ хардыы” конференцияҕа Төрүччүнү үөрэтии туспа хайысха быһыытынан 2024 сылтан киирбитэ. Быйыл бу хайысхаҕа 39 эдэр чинчийээччи кыттыыны ылла. Икки түһүмэххэ 17 оҕо кыттар быраабы ылбыта.
Эдэр чинчийээччилэр ортолоругар ааспыт сыллааҕы үлэлэрин салгыыр, ону таһынан саҥа саҕалааччылар эмиэ бааллар.
Икки күннээх конференция түмүгүнэн бастыҥ үлэлээх чинчийээччилэр Анна Тесленко (Х кылаас, М.П Кочнева аатынан 1 №-дээх орто оскуола, Нерюнгри), Кристина Портнягина (VIII кылаас, Х.М Николаев аатынан Өлөөн орто оскуолата), Дайаана Тихонова (Х кылаас, С.П. Алексеев-Боһуут аатынан Чаппанда орто оскуолата, Ньурба), Бэргэн Шамаев (V кылаас, 2 №-дээх Нам орто оскуолата), Егор Оплачко (V кылаас, Алдан лиссиэйэ), Алгыс Попов (IX кылаас, И.М. Романов аатынан Төхтүр орто оскуолата, Мэҥэ Хаҥалас), Маша Собакина (IX кылаас, П.М Васильев аатынан Соловьев орто оскуолата, Чурапчы) Арассыыйа таһымнах научнай куонкурустарга кыттар ыҥырыылары туттулар.
Түмүк туһунан сиһилии манна көрүҥ: https://sitf.lensky-kray.ru/wp-content/uploads/2025/01/9.2-Genealogicheskie-issledovaniya.pdf
Төрүччү хайысхатыгар экспертнэй хамыыһыйа салайааччытын Саргылана Егоровна Никитинаны көрсөн кэпсэттим. Кини – историческай наука кандидата, СО РАН Гуманитарнай чинчийии уонна хотугу аҕыйах ахсааннаах норуоттар проблемаларын институтун научнай сотруднига.
– Биһиги Төрүччүгэ хайысхабыт ааспыт сылтан үлэлиир. Былырыын саҥа саҕалааһын эбит буоллаҕына, быйыл лаппа уопутурдубут. Быйыл Төрүччүгэ кыттарга сүүмэрдэммит үлэлэр барыта Аччыгый Академия Билимин (МАН) саайтын нөҥүө кытаанах бэрэбиэркэни аастылар. Ол эрэ кэнниттэн кинилэр конференцияҕа кыттар быраабы ылбыттара. Онон чахчы хаачыстыбалаах, таһымнаах үлэлэри көрдүбүт диэн сыаналыыбын. Ордук хаачыстыбалаах үлэлэр 9-с, 10-с кылаас үөрэнээччилэрэ көрдөрдүлэр. 5-с, 6-с кылаастарга эмиэ интэриэһинэй үлэлэр бааллар. Кыайыылаахтар ортолоругар хаһыс да сылларын чинчийэр, сылтан сыл кэҥэтэн иһэр үлэлээх оҕолор бааллар. Төрүччүгэ анаан дьарыктанар оҕолор үлэлэрин салгыы сайыннаралларыгар баҕарабын. “Инникигэ хардыы” конференцияҕа ситиһии оҕо үрдүк үөрэххэ туттарсан киирэригэр эбии балл биэрэр туһунан эмиэ санатан этиэхпин баҕарабын, – диэн Саргылана Егоровна Никитина конференция кэнниттэн санаатын үллэһиннэ.
Экспертнэй хамыыһыйа чилиэнэ, Саха өрөспүүбүлүкэтин Национальнай архыыбын информационнай өҥөнү оҥорор отдел начальнига Екатерина Анатольевна Сергеенко эдэр чинчийээччилэр архыып дааннайдарын туһаналларын сэргээбитин туһунан эттэ уонна Аҕа дойду Улуу сэриитин туһунан чинчийэр үлэлэрин көмүскээбит М.А. Алексеев аатынан Үөһээ Бүлүүтээҕи гимназия VI кылааһын үөрэнээччитигэр Антон Герасимовка уонна Алданнааҕы лиссиэй V кылааһын үөрэнээччитигэр Егор Оплачкоҕа Кыайыы 80 сылыгар аналлаах 2025 сыллааҕы халандаары бэлэхтээтэ.
Алена КСЕНОФОНТОВА, VIII кылаас,
С.Д. Флегонтов аатынан Хадаар орто оскуолата, Чурапчы