Муус устар 5 күнүгэр Чурапчы улууhун Алаҕар нэһилиэгэр Афанасий Кирикович Софронов аатынан хайыһар күрэҕэр комплекснай спартакиада буолан ааста.
Бу күрэххэ 18-тан үөһээ саастаах хайыһардьыттар кыттыыны ыллылар. Биһиги нэһилиэкпититтэн Николай Афанасьевич Оконешников, Семен Степанович Андреев уонна Саина Алексеевна Евграфова кытыннылар.
Уопсайа 14 хамаанда, 55 спортсмен, ол иһигэр 35 эр киһи уонна 20 кэрэ аҥар кэлбиттэр. Хайахсыт хайыһардьыттара эстафетаҕа дьахталларга 1,5 км, онтон эр дьоннор 3 км сүүрэннэр төрдүс миэстэни ылары ситистилэр.
Биирдиилээн бастыырга Саина Алексеевна 1,5 км барыларын кэннигэр хаалларан, бастакы миэстэни ылан, үөрүүбүт улахан.
Уопсай түмүккэ хамаанданан бэһис миэстэ буоллулар. Онтон кыра нэһилиэктэргэ иккис миэстэни ылары ситистилэр.
Күрэхтэһии туһунан Саина Алексеевна Евграфова санаатын маннык үллэһиннэ:
– Хайыһарынан алын кылаастан дьарыктанабын. Хайыһарга угуйбут учууталым Ирина Николаевна Васильева буолар. Ахсыс кылааска сылдьан Чыаппара тренерын кытта Ким Михайлович Тимофеев салалталаах иккитэ сборга сылдьыбытым. Быйыл дьарыкпын сана саҕалаан Чурапчы сүүмэрдэммит хамнаадатыгар киирэн Егор Дмитриевич Елисеев салалталаах Бурятияҕа сборга баран кэллибит. Манна сылдьан элбэх саҥаны биллим. Биотлоҥҥа кыттан, сэттис миэстэ буолбутум. Уопсай түмүккэ Чурапчы улууһа бэйэтин бөлөҕөр бастакы миэстэни ылан үөрүүбүт улахан.
Быйыл элбэх курэххэ кытынным. Онтон бу биирдэстэрэ Афанасий Кирикович Софронов аатынан Чурапчы улууһун комплекснай спартакиадата буолар. Бастакы миэстэни ылан үөрдүм, долгуйдум.
Түмүккэ оҕолорго этиэм этэ: кыра сааскытыттан спорду таптаан, дьарыктанын. Спорт элбэххэ үөрэтэр.
Света ЗАРОВНЯЕВА, X кылаас,
А.П. Илларионов аатынан Хайахсыт орто оскуолата, Чурапчы