Кулун тутар 9 күнүгэр нэһилиэкпит баһылыга Прокопий Петрович Бубякин уолун Тимуру кытта Дьокуускай куоракка “Байанай” күрэҕэр кыттыыны ылла. Бу туһунан аҕа уонна уол санааларын үллэстэллэригэр көрдөстүм.
Прокопий Петрович Бубякин:
– Уолум Тимур Дьокуускайдааҕы саха гимназиятыгар XI кылааска үөрэнэр. Бүгүн буолан ааспыт VII “Аҕа күрэҕин” Дьокуускай куорат дьаһалтата тэрийэн ыытта. Биһиги “Центральнай” уокуруктан саха гимназиятын аатыттан кыттыыны ыллыбыт. Уопсайа 10 хамаанда күрэхтэстэ. Уолум үөрэнэр оскуолатыгар ким тэтиэнэҕин, кыахтааҕына көрөн эппиттэригэр сөбүлэспиппит. Маннык күрэххэ уруккуттан кыттар баҕалаах этибит. Тимур “Боотур” кулуупка многоборьенан дьарыктанар. Өрөспүүбүлүкэ күрэхтэһиилэригэр кыттар. Быйыл оскуолатын бүтэрэр, онон бүтэһик сылыгар кыттарга быһаарыммыппыт. Нэһилиэк баһылыгынан үлэлиир буоламмын, бэлэмнэнэргэ бириэмэм олус кылгас этэ. Дьаһалтам үлэһиттэрэ өйөөннөр, үлэбиттэн босхолоон, үс күн эрчиллинним. Кутаа оттон чэй оргутуутугар, остуолбаҕа ыттыыга, мас суоруутугар, мас бэлэмнээһиҥҥэ, ойбон алларыытыгар уонна туут хайыһарынан сүүрүүгэ күрэхтэстибит. Саамай ыарырҕаппыт көрүҥүм – остуолбаҕа ыттыы. Бу иннинэ дьарыктанарбытыгар сатаныа суох курдук этэ. Ол эрэн күрэх кэмигэр туох баар күүспүтүн, кыахпытын ууран, Тимур 2,5 м, бэйэм 1,5 м тахсан, бу көрүҥҥэ төрдүс миэстэ буоллубут. Мас бэлэмнээһинигэр бастакы миэстэни ыллыбыт. Онтон уопсай түмүккэ 10 хамаандаттан төрдүс миэстэҕэ таҕыстыбыт.
Мин санаабар, маннык күрэх аҕа уолун кытта доҕордоһуннарар, ыкса сибээстиир, ону тэҥэ эт-хаан өттүнэн эрчийэр. Уол оҕону, эр киһини тыа дьонун күннээҕи үлэтин нөҥүө өйүн-санаатын сайыннарар, этин-сиинин дьарыктыыр, эрчийэр. Онон күрэх сүрүн сыаннаһа итиннэ сытар.
Тимур Бубякин:
– Аҕабын кытта күрэххэ бэркэ кытынныбыт. Бастакы сырыыга үчүгэй көрдөрүү дии саныыбын. Мин ыарырҕатар көрүҥмэр кутаа оттон чэй оргутааһыныгар аҕабыттан элбэх сүбэни иҥэринним. Бу күрэххэ кыттаммын билбэтэхпин биллим, бэйэбэр элбэх саҥаны арыйдым. Онон маннык күрэххэ кыттарга кыах биэрбит оскуолабар, аҕабар, дьиэ кэргэммэр махтанабын.
Нэһилиэкпит баһылыга Прокопий Петрович Бубякин уол оҕону иитиигэ тус бэйэтинэн холобур буолара олус үчүгэй дии саныыбын.
Эрчим НИКОЛАЕВ, VIII кылаас, Эмис, Амма