Хаҥалас улууһун М.Е.Васильева аатынан 2 Малдьаҕар орто оскуолатын 1 кылааһын үөрэнээччилэрэ кылаас салайааччытын Валентина Михайловнаны кытта клубника үүннэрэллэр. Клубникалара улааттаҕына, дьиэлэригэр илдьэн олордуохтара, хас биирдии ыал тэлгэһэтигэр клубника үүнэн чэлгийиэ. Оҕолор клубниканы хайдах олордубуттарын туһунан маннык кэпсээтилэр.
“Биһиги клубниканы наһаа сөбүлүүбүт. Клубника олус минньигэс, наһаа үчүгэй сыттаах. Кини кып-кыра сиэмэлээх. Сиэмэтин тохсунньу 15 күнүгэр торфяной таблеткаларга ыспыппыт. Биир нэдиэлэнэн сиэмэттэн элбэх сэбирдэхтэр көстүбүттэрэ. Олунньу 22 күнүгэр клубникаларбытын торфяной таблеткаларга биир-биир олордубуппут. Бу тымныыны тулуйар клубника. Аата Хандыга клубниката диэн. Кыһын хаар анныгар утуйар, онтон саас тиллэн тахсар. Сайын устата хаста да аһын биэрэр. Сайын клубниканы дьиэбит таһыгар олордуохпут. Клубникабыт кытардаҕына эмиэ сиэмэтин ылыахпыт. Уонна эһиил клубникабытын өссө элбэтиэхпит”.
М.Е. Васильева аатынан 2 Малдьаҕар орто оскуолатын медиакиинэ