Олунньу 14 күнүгэр Чурапчы нэһилиэгэр Саха өрөспүүбүлүкэтин ситэриилээх былааһын 2023 сыллааҕы үлэтин отчуота буолан ааста.
Манна Арыылаах нэһилиэгин Таҥаратын дьиэтин рестоврациятын туһунан ыйыталастылар. Тыа хаһаайыстыбатын тула кэккэ боппуруостар турдулар. Ол курдук чааһынай ыалтан үүтү туппат буолан, үүт бородуксуйата лаппа ачаабытын, сыл ахсын сүөһү, сылгы ахсаана аҕыйыы турарын аҕыннылар. Одьулуун быһыта эргэрбитин нэһилиэк баһылыга эттэ. Чурапчы колледжын дьиэтэ аварийнай туруктааҕын, балыыһа дьиэтэ алыҥ этээһэ тымныытын туһаайан эттилэр.
Олохтоохтору сытыытык интириэһиргэтэр боппуруоһунан биһиги оскуолабытын туһунан буолла. Сэмэн Ноҕоруодап аатынан Чурапчы оскуолатын иккис уочаратын тутуу боппуруоһун оскуолабыт дириэктэрэ, Саха өрөспүүбүлүкэтин үөрэҕириитин туйгуна Надежда Васильевна Уарова ыйытта. Ону тэҥэ төрөппүттэр оҕолоро икки сменанан үөрэнэллэрэ оҕо сайдыытыгар үгүс мэһэйи үөскэтэрин туһунан санааларын эттилэр. Оскуола биир сменанан үлэлиирэ ордугун туруорустулар.
Оскуола 2011 сылтан алын сүһүөх оскуоланы кытта холбоһуоҕуттан, кылаас тиийбэтиттэн, икки сменанан үлэлиирин, кэлиҥҥи сылларга оҕо ахсаана лаппа элбээбитин бэлиэтээтилэр. Эһиилги үөрэх дьылыгар оҕо ахсаана өссө да элбиир кыахтаах эбит. Күн бүгүн уопсайа оскуолаҕа 1198 оҕо үөрэнэр. Оскуола кыараҕас буолан, эбии кылаастар тиийбэттэр. Онон эбии үөрэхтээһин ыытылларыгар үгүс ыарахаттар үөскүүллэр. Онон оскуола иккис уочарата тутуллара тыын боппуруос буолбутун күүскэ туруорустулар.
Олохтоохтор доруобуйа харыстабылын эйгэтигэр сыһыаннаах боппуруостары уонна хаарбах туруктаах дьиэттэн көһүү, благоустройство, Чурапчы быһытын бөҕөргөтүү туһунан ыйыттылар.
Түмүккэ Саха өрөспүүбүлүкэтин 2023 сыллааҕы үлэтин сөптөөҕүнэн сыаналаатылар. Тыа хаһаайыстыбатыгар, доруобуйа харыстабылыгар, спортка сыһыаннаах ыйытыыларга хоруйдары биэрдилэр.
Отчуот туһунан видеону https://vk.com/wall-199463452_17173
Кэскилээнэ СИВЦЕВА, VIII кылаас,
С.А. Новгородов аатынан Чурапчы орто оскуолата
Видео Самсон Саввин, Тэтим LIFE» оҕо телестудиятын салайааччыта