Олунньу 14 күнүгэр Чурапчы нэһилиэгэр «Айылгы» култуура киинигэр Бырабыыталыстыба 2023 сыллааҕы үлэтин отчуотугар мин С.К. Макаров аатынан Чурапчы гимназиятын “Тумус кыһа” пресс-киинин аатыттан сырыттым.
Отчуот хайдах ааһарын, улахан дьон хайдах мунньахтыырын истэн-көрөн кэллим. Улуус олохтоохторо, чуолаан Чурапчы нэһилиэгин дьоно-сэргэтэ, отчуокка кэлбиттэр. Мунньах саҕаланыытыгар нэһилиэк, улуус сайдыытын туһугар таһаарыылаахтык үлэлии-хамсыы сылдьар олохтоохтору наҕараадалаатылар. Ону тэҥэ «Эдэр ыаллары олорор дьиэнэн хааччыйыы» бырагыраама сэртипикээттэрин туттардылар.
Мунньахха олохтоохтор санааларын эттилэр, үгүс ыйытыы биэрдилэр. Маны таһынан балыыһа, оҕо бибилэтиэкэтин өрөмүөнүн, оскуола тутуутун о.д.а. туруорустулар.
Боппуруостар араас хайысхалаах буоллулар. Үөрэх, доруобуйа харыстабылын, тыа хаһаайыстыбатын, благоустройство эйгэтигэр сыһыаннаахтар. Биир үөрүүлээх сонун светофор туруорарга сэртипикээти улууспут баһылыгар туттарбыттара буолар. Бырабыыталыстыба үлэтин-хамнаһын дьон-сэргэ үчүгэй сыанабылы биэрэн куоластааһын нөҥүө бигэргэттилэр.
Отчуот туһунан дьон маннык санаалаах тарҕастылар.
Лилия Анатольевна Рожина, “Алмазкредитсервис” Чурапчытааҕы филиалын менеджерэ:
– Биһиги ыал «Эдэр ыаллары олорор дьиэнэн хааччыйыы» бырагыраамаҕа 2016 сылтан уочаракка турбуппут. Быйыл көмө харчытын ыламмыт үөрүүбүт үгүс, эдэр ыалга көмөлөһөллөрө наһаа үчүгэй. Эдэр ыалларга уочаракка туруҥ диэн сүбэлиэм этэ.
Константин Назарович Кривошапкин, урбаанньыт, фермер:
– Отчуокка улахан баҕайы Бырабыыталыстыба састааба кэлбит, дьон-сэргэ толору. Бырабыыталыстыба мунньаҕа хайаан да наада. Бу мунньах, отчуот, тэриллэр буолан дьон санаатын туруорсар кыахтаах.
Елена Николаевна Семёнова, «Кыталык» оҕо саадын иитээччитэ:
– Бырабыыталыстыба отчуоттуур мунньаҕар саалаҕа толору дьон кэлбит. Джулустан Борисов салайааччылаах бөлөх ааспыт сыл үлэтин түмүгүн иһитиннэрдилэр. Отчуот түмүгүнэн олохтоохтор бэйэлэрин ыйытыыларын биэрэн сөптөөх хоруйдары ыланнар, этиилэрин, санааларын тиэртилэр.
***
Отчуокка үлэ хайдах барбытын, төһө харчы ороскуоттаммытыгар тиийэ отчуоттанар эбит. Дьон ыйытыылара, туруорсаллара олус элбэх уонна ол барыта чахчы наһаа наадалаах. Отчуот, мин санаабар, үчүгэйдик ааста. Дьон олоҕо тупсарын туһугар үгүс үлэ ыытылларын сэргии иһиттим. Бу курдук олохпут-дьаһахпыт сайда, тупса туруо диэн эрэнэбин.
Вилена СТРУЧКОВА, VIII кылаас,
“Тумус кыһа” пресс-киин, Чурапчы гимназията