Бүлүү бөлөх улуустарын оскуолалара олунньу 2 күнүгэр Ньурбаҕа Марха орто оскуолатыгар “Саас” форумҥа түмсэн аастыбыт. Марха оскуолатыгар киирээппитин кытта алаадьылаан көрсүбүттэрэ олус да үчүгэй этэ!
Тэрийээччилэр Н.Е. Мординов-Амма Аччыгыйа аатынан “Кэскил” оҕо бэчээтин кыһата. Дьокуускайтан айаннаан кэлэн, олус үчүгэй, дириҥ ис хоһоонноох форуму ыыттылар. “Кама Хана” студия төрүттээччитэ уонна режиссера, “Муус Устар” фестиваль 2022 сыллааҕы кыайыылааҕа Юрий Борисов олус интэриэһинэй маастар-кылааһы ыытта.
Мин бу форумҥа кыттыыны ылбыппыттан үөрдүм, астынным. Барыта наһаа түргэнник бүтэн хаалла эрээри биһиэхэ элбэҕи биэрдэ.
Балтараа чаас курдук үлэлээн, “Спортсмен тус аһылыга” диэн медиа бырайыакпытын көмүскээтибит уонна бастакы миэстэ буоллубут! Иккис миэстэни И.Г. Чиряев аатынан 1№-дээх Бүлүү орто оскуолатын “Ориентир” медиа киинин хамаандата ылла. Кинилэр “КБК – Күүстээх, Кыахтаах буол” диэн медиа бырайыагы оҥорон таһаарбыттар. Үһүс миэстэҕэ Ньурба улууһун Маар орто оскуолатын “Юла” медиа киин хамаандата таҕыста. Кинилэр бырайыактарын аата “Азия оҕолоруттан” – спорт улахан түһүлгэтигэр” диэн.
Форум кыайыылаахтара Дьокуускайга “Сосновый бор” оҕо сынньалаҥ киинигэр барар путевканан наҕараадаланныбыт уонна “Муус устар” өрөспүүбүлүкэтээҕи фестиваль финалыгар кыттыыны ылыахпыт. Онон ситиһиилээхтик кыттаммыт олус астынан дьиэбитигэр кэллибит.
Карнелия ИСАГАЛИЕВА, IX кылаас, Күндэйэ, Сунтаар