Олунньу 2 күнүгэр, дьыл оройугар, Мэҥэ Хаҥалас улууһун Майа нэһилиэгэр Ф.Г. Охлопков аатынан Майа орто оскуолатыгар “Саас” медиа форум буолан ааста. Илин эҥэр биэс улууһун – Амма, Мэҥэ Хаҥалас, Чурапчы, Таатта, Уус Алдан – оскуолаларын хамаандалара кыттыыны ыллыбыт.
Амма улууһуттан үс хамаанда: “Амма Кэскилэ” ( Сатаҕай, Амма оскуолаларын хомуур хамаандата) Мээндиги, Өнньүөс оскуолалара буолан кытынныбыт. Биһигини Розалия Николаевна Павлова, Ольга Николаевна Никитина салайан илдьэ сырыттылар.
Форум арыллыытыгар Н.Е. Мординов-Амма Аччыгыйа аатынан “Кэскил” оҕо бэчээтин кыһатын дириэктэрэ Ольга Ивановна Семенова кэпсээбитин курдук, “Саас” форумҥа өрөспүүбүлүкэ үрдүнэн 500-кэ оҕо кыттыан баҕарарын туһунан биллэрбит. Олунньу 2 күнүгэр Майаҕа курдук, Ньурба улууһун Марха оскуолатыгар Бүлүү бөлөх улуустарын оҕолоругар аналлаах “Саас” форум эмиэ тэҥҥэ ыытыллыбыт.
Форумҥа кытта кэлбит хамаандалар сүрүн сорукпут – видеоролик оҥорон таһаарыахтаахпыт. Ол иининэ сценарыйы хайдах суруйар, сюжеты хайдах устар, спортивнай тэрээһини хайдах сырдатар туһунан кэпсээтилэр, маастар-кылаас ыыттылар. 1-2 мүнүүтэлээх видеону оҥорон таһаарар элбэх толкуйтан, киэҥ көрүүттэн оҥоһуллан тахсарын өйдөөтүбүт.
Ордук спортивнай комментатор, Мэҥэ Хаҥалас улууһун Алтан орто оскуолатын дириэктэрэ Степан Степанович Посельскай маастар-кылааһын сөбүлээтибит. Кини Лев Толстой “Война и мир” романын омуктуу ааҕа сылдьар эбит. Мин омук тылын интэриэһиргиир буоламмын, итини олус сэҥээрэ иһиттим.
Биһиги оҥорон таһаарыахтаах видеобыт тиэмэтин жеребьевкалаан таллыбыт. “Олорор нэһилиэккин хайдах сайыннарыаххын сөбүй?” диэн тиэмэ түбэспитэ. Онон хамаанданан үлэбитин саҕалаабыппыт. Сүрдээҕин бэлэмнэммиппит эрээри бирэмэбитин кыайан аттарбакка, үлэбитин ситэ түмүктээбэтэх курдукпут. Ол да буоллар бу форумҥа сылдьаммыт оҕолору кытта билистибит, доҕордостубут. Туох итэҕэстээхпитин, ону хайдах туоратыахпытын сөбүн туһунан толкуйдаатыбыт. Элбэх саҥаны биллибит, атын оҕолору көрөн үөрэннибит.
Маша ЛУКИНА, Елена НИКИТИНА,
Х кылаас, Сатаҕай орто оскуолата, Амма
Максим Брызгалов, Айсен Верховцев, Ганя Сивцев хаартыскалара,
«ОхлопковNews» медиа-киин, Ф.Г. Охлопков аатынан Майа орто оскуолата