Дойду Президенэ В.В. Путин Ыйааҕынан 2018 сыл – Волонтер сылынан биллэриллибитэ.
Волонтер диэн кимий? Кини бэйэтин ис санаатыттан, туох да төлөбүрэ-манньата суох, уопсай дьыаланан дьарыктанар киһи.
Волонтердар кырдьаҕастарга-кыамматтарга көмөлөһөллөр, сүппүт дьону көрдүүллэр, бэйдиэ барбыт ыттары көрөллөр-харайаллар, уулуссалары ыраастыыллар, айылҕаны харыстыыллар. Ол аата бу дьон дойдулара тупсарыгар, дьон олоҕо чэпчииригэр кыһаллаллар.
Бүгүн бу балаһаҕа уонна да салгыы сыл устата волонтер оҕолорбут туһунан сырдатыахпыт.
Халыҥ хаартан быыһаатылар
Нина Николаевна ЯКОВЛЕВА, Хаптаҕай оскуолатын эдкорпоһун салайааччыта, Мэҥэ Хаҥалас:
– Волонтер сыла биллэриллибитинэн, оскуола үөрэнээччилэрэ нэһилиэк ытык-мааны бэтэрээннэригэр сааскы үлэҕэ көмөлөрө үгүс. Саас халыҥ хаар түһэн, дьон олбуордарыттан кыайан тахсыбат кутталлара үөскээбитэ. Ону ыраастыырга оскуолабыт үөрэнээччилэрэ күүс-көмө буоллулар.
Ол курдук, омук тылын учуутала А.Ю. Терентьева салайааччылаах VIII кылаастар бэтэрээн учууталларга Д.Д. Егоровка уонна кини кэргэнигэр, Д.Д Ларионоваҕа, М.Г. Самсоноваҕа көмөлөстүлэр.
Көмөҕө — үөрүүнэн
Надежда Ивановна СЕМЕНОВА, “Сардаҥа” пост (Намнааҕы оҕо киинэ):
– Нам 1 №-дээх орто оскуолатын V кылааһын үөрэнээччилэрэ Оҕо киинигэр “Краевед” диэн куруһуокка сылдьаллар. Соторутааҕыта тыыл, үлэ бэтэрээнигэр Людмила Георгиевна Гаврильеваҕа сылдьан, көмө оҥордулар, хаарын күрдьэн биэрдилэр.
Биллигит? «Пионерская зорька»!
Валентина Васильевна СТРЕКАЛОВСКАЯ, Уус Алдан улууһун Уһун Күөл оскуолатын тэрийээччи-педагога:
– «Пионерская зорька» оҕо түмсүүтэ (сал. А.А. Лыткина) тимурдуу үлэнэн тыыл, педагогическай үлэ бэтэрээннэригэр мас саһаанныыллар, хаар түһэрэллэр, хортуоппуйдарын хостоон биэрэллэр, «Аһымал» аахсыйаны ыыталлар, о.д.а үлэҕэ көхтөөхтүк кытталлар. Волонтердарбыт уулусса ыраастааһыныгар үлэлииллэр.
Эбэбитин — ыраастык
Анастасия МОРДОВСКАЯ, “Эрэл” пост салайааччыта (Дьөппөн санаторнай оскуолата, Хаҥалас):
– Иванна Павлова, Алена Петрова, Леня Аммосов, Кирилл Федоров, Наина Маческинова уо.д.а. буолан, субуотунньуктаан, эбэ күөлбүтүн ыраастаатылар.
Таисия Алексеева.