Олунньу 14 күнүгэр биһиги нэһилиэкпитигэр Саха Өрөспүүбүлүкэтин Бырабыыталыстыбатын 2024 сыллааҕы үлэтин отчуоттуур мунньаҕа буолан ааста.
Отчуоттуур бөлөх салайааччыта СӨ култуураҕа уонна духуобунай сайдыыга миниистирэ Афанасий Иванович Ноев. Бөлөх састаабыгар улуус баһылыгын э.т. Илья Юрьевич Артамонов, СӨ тыа хаһаайыстыбатын миниистирин солбуйааччы Анна Александровна Стручкова, СӨ дьиэ-уот надзорун уонна государственнай тутуу управлениетын салайааччыта Аргунов Павел Анатольевич, СӨ үөрэҕириитин уонна наукатын государственнай сулууспа уонна юридическай хааччыйыы кадрга отделын салайааччыта Винокурова Мария Михайловна, СӨ олох-дьаһах коммунальнай хаһаайыстыбатын производственнай-техническай управлениетын начальнига Емельянов Павел Павлович, СӨ тутууга Министиэристибэтин тутуу уонна олох-дьаһах политикатын Департаменын салайааччытын солбуйааччыта Иванов Гаврил Егорович, СӨ Тыа хаһаайыстыбатын уонна ас-үөл бэлиитикэтин миниистирин солбуйааччы Павлова Сахаяна Афанасьевна, СӨ доруобуйа харыстабылын министиэристибэтин хонтуруоллуур- ревизионнай үлэтин уонна аудитын сүрүн специалиһа Илларионов Михаил Михайлович, СӨ экономикатын министерствотын федеральнай программалары уонна госкапложениялары кытта үлэҕэ департаменын салайааччытын солбуйааччы Илларионов Айсен Афанасьевич, урбаан министиэрстибэтиттэн Никифоров Петр Гаврильевич, Арассыыйа уонна СӨ Биэнсийэ пуондатын уонна социальнай страховкалааһын салаатын салайааччыта Белолюбский Руслан Матвеевич уонна
Уус Алдан улууһун салайааччылара —
Нафанаилов Сергей Сергеевич, култуура улуустааҕы управлениетын начальнига, Черкашин Сергей Гаврильевич, киин балыыһа кылаабынай бырааһа, Попов Петр Петрович, тыа хаһаайыстыбатын управлениетын начальнига, Герасимов Руслан Николаевич, улуус архитектура уонна тупсаран тутуу учреждениетын начальнигын солбуйааччыта бааллар.
Нэһилиэнньэҕэ бөлөх салайааччыта А.И. Ноев 2024 сылга өрөспүүбүлүкэ үрдүнэн ыытыллыбыт үлэлэр түмүктэрин иһитиннэрдэ.
Биһиги нэһилиэкпит ааспыт сылга үс улахан боппуруоска ситиһиилэрдээх.
Ол курдук, Танда-Бороҕон суола өрөспүүбүлүкэ бас билиитигэр киирэн, 2027 сылга диэри суол үлэтэ түмүктэниэхтээх. Саҥа спортсаала салҕыы тутуутун үбүлээһинэ Ил Түмэҥҥэ эбии көрүллүөхтээх. Котельнай реконструкциятын үлэтэ салҕыы ыытыллар.
Олохтоох нэһилиэнньэ тыын боппуруоһун киин ититэр ситимҥэ 100% холбонууну туруоруста. Онуоха бу боппуруос субсидия көрүллүүтүттэн тутулуктааҕын туһунан олох-дьаһах коммунальнай хаһаайыстыбатын министиэристибэтэ хоруйдаата. Маны таһынан олохтоохтор култуура саҥа дьиэтин тутуутун туоһуластылар. Уонна сүрүн боппуруостары суругунан туһааннаах министиэристибэлэргэ туттардылар. Мунньахха киирбит боппуруостарынан, этиилэринэн нэһилиэнньэни кытта аһаҕас кэпсэтии буолла.
Мин отчуоттуур бөлөх салайааччытыттан СӨ култуураҕа уонна духуобунай сайдыына миниистириттэн Афанасий Иванович Ноевтан грантовай өйөбүл туһунан ыйыталастым. Холобур, мин нэһилиэк олохтооҕо буолан тураммын грантовай бырайыактарна хайдах кыттыахпын сөбүн туһунан ыйыталаспыппар Афанасий Иваанович маннык хоруйдаата:
— Билигин Саха өрөспүүбүлүкэтигэр даҕаны, Арассыыйаҕа даҕаны обшественниктар инициативаларын, баҕа санааларын нэһилиэктэргэ, улуустарга, куораттарга олоххо киллэрэллэригэр араас хайысхалар бааллар. Чуолаан өрөспүүбүлүкэ таһымыгар сыһыаран этэр буоллахха, нэһилиэк салалтатынан «ППМИ», ол аата олохтоох инициативаны өйүүр программа баар. Маны сэргэ Ыччат политикатын министиэристибэтин хайысхатынан грантовай бырайыактары эмиэ өйүүллэр. Өссө култуурунай инициативалар Федеральнай фондата диэн баар. Бу Арассыыйа үрдүнэн барытынан үлэлиир. Култуурунай, духуобунай хайысхалаах бырайыактары өйүүллэр. Грантовай өйөбүлү туһаныыга докумуон өттүнэн оҥоруутун кыайыахха наада. Саамай сүрүнэ, үбү-харчыны ылан баран сөпкө туһаныахха, отчуоттуохха наада.
Валерия ГОТОВЦЕВА, X кылаас, “Байаҕантай кэскиллэрэ” юнкор пост, М.Н. Готовцев аатынан Танда орто оскуолата, Уус Алдан
Снежанна Готовцева хаартыскалара, VIII кылаас