Быйыл дойдубут үрдүнэн Улуу Кыайыы 80 сылын бэлиэтиибит. Улууспутугар үбүлүөйдээх сыл чэрчитинэн үгүс тэрээһиннэр ыытылаллар.
Тохсунньу 30 күнүгэр А.А. Саввин аатынан Чурапчытааҕы история уонна этнография түмэлигэр «Движение Первых» волонтердара Бүтүн Арассыыйатааҕы «Трудовая доблесть. Лица Победы» бырайыакка кыттыыны ыллыбыт.
Волонтердар Аҕа дойду Улуу сэриитин сыллааҕы Чурапчы улууһун тыыл бэтэрээннэрин уонна көһөрүллүү кыттыылаахтарын туһунан информацияны «Лица Победы» историческай депозитарийга киллэрдилэр. Онно Чурапчы түмэлин архыыбын дааннайдарын тутуннулар.
«Трудовая доблесть. Лица Победы» бырайыак 2025 сыл муус устар 15 күнүгэр диэри ыытыллар. Онуоха диэри, хас чэппиэр аайы, Чурапчытааҕы түмэлгэ бырайыакка кыттыан баҕалаах волонтердары күүтэллэр.
Бу туһалаах бырайыак. Тоҕо диэтэххэ, Кыайыыны уһансыбыт дьоммут сырдык ааттарын үйэтитиигэ көмөлөһөр. Эдэр көлүөнэ, кэнчээри ыччат, эбэлэрбит, эһэлэрбит олохторун толук ууран дьоллоох, эйэлээх олоҕу ситиспит үтүөлэрин умнарбыт сатаммат.
Маша СИБИРЯКОВА, X кылаас, «Тумус кыһа» медиа киин,
С.К. Макаров аатынан Чурапчы гимназията