Төрүт саха оонньуутун — хапсаҕайы сэҥээрээччилэргэ дьоһун күн буолла. Ахсынньы 6 күнүгэр Дүллүкү орто оскуолатын саалатыгар хапсаҕайга Саха АССР спордун маастара, “Манчаары оонньууларын” икки төгүллээх кыайыылааҕа, Константин Иванович Мандаров сырдык аатыгар оҕолорго хапсаҕай күүрээннээх түһүлгэтэ буолан ааста.
Бу күрэх оҕолорго улуус спартакиадатын чэрчитинэн ыытыллар. Барыта 130-тан тахса бөҕөс кытта кэлбит. Уопсайа 8 ыйааһыҥҥа күрэхтэстилэр.
Күрэхтэһии үөрүүлээх арыллыытыгар Дүллүкү нэһилиэгин баһылыга Николай Романов, оскуола дириэктэрэ Тихон Егоров, Үөрэҕирии салалтатын начальнигын иитэр үлэҕэ солбуйааччы Николай Платонов, күрэхтэһии сүрүн судьуйата Увар Тимофеев, К.И.Мандаров уола Петр Мандаров тыл эттилэр, кыттааччыларга ситиһиини, тулууру, дьулууру, «ким күүстээх, бэлэмнээх — ол кыайдын» диэн баҕа санааларын тиэртилэр. Күрэҕи «Үөһээ Бүлүү улууһа» МО администрацията, Кырыкый, Дүллүкү, Далыр, Маҥаас нэһилиэктэрэ, Константин Иванович оҕолоро, аймахтара, табаарыстара тэрийэн ыыттылар. Биһиги күрэх кыттааччыларын уонна сүрүн судьуйаны кытта кэпсэттибит:
Увар Егорович Тимофеев, күрэхтэһии сүрүн судьуйата:
—Улууска хапсаҕайга сүрүн тренербин. Ытыктабыллаах убайбыт Константин Иванович Мандаров аатынан күрэхтэһии буолаары турар Федерация кубогар сүүмэрдээһин буолар. Уолаттарбыт туруктарын көрөбүт. Сарсын ыччакка, эр дьоҥҥо, бэтэрээннэргэ буолаары турар. Мин санаабар, олус үчүгэй күрэх ааста. Махтаныам этэ Дүллүкү нэһилиэгин администрациятыгар,олохтоохторугар, К.И.Мандаров оҕолоругар, аймахтарыгар бэртээхэй күрэхтэһиини тэрийбиттэригэр.
Денис Потапов, күрэхтэһии Муҥутуур кыайыылааҕа, 70 киилэҕэ кыайыылаах:
—Мин Мэйик нэһилиэгиттэн төрүттээхпин, ол эрэн Хоро орто оскуолатыгар үөрэммит буолан, Хоро аатыттан киирсэ сылдьабын. Хапсаҕай миэхэ характер, күүс-уох, техника биэрэр. Тренердэрим — Егоров Михаил Михайлович уонна Литвинов Владимир Валерианович. Федерация Кубогар 2023 сыллаахха кыайыылаахпын, “Эрчимэн Бэргэн-2022” сыллааҕы кыайыылааҕабын уонна 2023 сылга призербун. Ыһыахтарга күрэхтэһэн элбэх ситиһиилэрдээхпин. Бэйэм санаабар, үчүгэйдик кииристим. Уолаттар бэлэмнэрэ, эрчиллиилэрэ олох үчүгэй.
Эрсан Лебедкин, күрэхтэһии кыттыылааҕа:
—Мин М.Т.Егоров аатынан 2 нүөмэрдээх орто оскуола 9 кылааһын үөрэнээччитэбин. Хапсаҕай миэхэ күүс-уох биэрэр, сытыы, сымса, ньоҕой буоларга үөрэтэр. Тренерим — Михаил Михайлович. Хапсаҕайга улахан ситиһиилэрим суохтар, ол эрээри инникитин баар буолуохтара диэн эрэнэбин. Бүгүн түөрт кыайыылаахпын, биир хотторуулаахпын. Финалга 3-с миэстэ иһин киирсиигэ кыаҕым төһө баарынан кииристим дии саныыбын. Уолаттар үчүгэй дьарыктаах уонна бэлэмнээх кэлбиттэрэ биллэр. Хапсаҕайтан ураты спорт бары көрүҥнэрин сөбүлүүбүн. Олортон футболу уонна волейболу ордоробун. Уолаттарга, кыттааччыларга ситиһиини баҕарабын.
Сандал Алексеев, күрэх боруонса призера:
—Мин Оҥхой нэһилиэгиттэн кыттабын. Хапсаҕайынан дьарыктанар киһи чөл олохтоох, сымса, түргэн, атаҕар тирэхтээх буолар. Платон Егорович Саввиновка дьарыктанабын. Саамай улахан ситиһиим — быйыл сайын буолан ааспыт “Азия оҕолоро” Норуоттар икки ардыларынааҕы 8-с спортивнай оонньууларга тустууга кыайыылаах буолбутум.Үчүгэйдик кытынным дии саныыбын, уолаттар бэлэмнэрэ үчүгэй.
Сымсалар, күүстээхтэр, бигэ тирэхтээхтэр, быыппастар былчыҥнаахтар, сытыы тэбиилээхтэр күрэхтэрэ киэһэ 7 чааска диэри буолла. Кыайыылаахтар билиннилэр. Оскуоланан түмүк 3 бөлөҕүнэн маннык таҕыста. Нам, Харбалаах, Оҥхой оскуолатын хамаандалара бастаатылар.
Чулуу хапсаҕайдьыт, киһи кэрэмэһэ Константин Иванович Мандаров аатын үйэтитиигэ аналлаах үөрэнээччилэргэ аһаҕас турнир өрө күүрүүлээхтик үрдүк тэрээһиннээх ааста.
Алина Санникова, X кылаас, Айыына Петрова, Александра Иванова, Таня Иванова , VIII кылаас, «Эрчим» медиа-киин, Дүллүкү орто оскуолата, Үөһээ Бүлүү