Бүгүн, муус устар 19 күнүгэр Чурапчыга Александр Иванович Федотов аатынан спортивнай комплекска улуустааҕы «IT» бэстибээл буола турар.
Бу тэрээһин сүрүн сыалынан оҕо дэгиттэр кыаҕын арыйыы, угуйуу, аан дойду сайдыытын тэтимигэр атын омук ыччатын кытта тэҥҥэ хардыылыыр, алтыһар, саҥаны айан таһаарар дьоҕурдаах ыччат тахсар эйгэтин тэрийии буолар.
Кыттааччылар кимнээҕий?
Барыта 10 хамаанда кыттыыны ыла сылдьар:
Тихон Михайлович Каженкин аатынан Арыылаах орто оскуолата;
Николай Дмитриевич Субуурускай аатынан Болтоҥо орто оскуолата;
Иван Егорович Федосеев –Доосо аатынан Дириҥ орто оскуолата;
Одьулуун орто оскуолата;
Георгий Прокопьевич Башарин аатынан Сылаҥ орто оскуолата;
Василий Сергеевич Соловьев-Болот Боотур аатынан Хатылы орто оскуолата;
Семен Дмитриевич Флегонтов аатынан Хадаар орто оскуолата;
Степан Кузьмич Макаров аатынан Чурапчы гимназията;
Иван Михайлович Павлов аатынан Чурапчы орто оскуолата;
Семен Андреевич Новгородов аатынан Чурапчы орто оскуолата.
Бэстибээл үөрүүлээх арыллыыта
Бу күн көмпүүтэр спордугар СӨ Первенствотын кыайыылааҕар, Арыылаах орто оскуолатын 7-с кылааһын үөрэнээччитигэр Костя Христофоровка СӨ физическэй култуура уонна спорт министиэристибэтин грамотатын үөрүүлээхбыһыыга-майгыга туттардылар. Кибер спорт улуустааҕы күрэҕин кыайыылаахтарын наҕараадалаатылар, Арыылаах орто оскуолатын киберспортивнай куруһуогар көмпүүтэр ыларга сэртипикээт туттардылар.
Чурапчы улууһун баһылыгын солбуйааччыта Мария Филипповна Кронникова, Чурапчы улууһун үөрэҕин салалтатын начальнигын солбуйааччыта Оксана Юрьевна Коркина эҕэрдэлээтилэр.
Бэстибээл генеральнай спонсора – “Интеграция«
Бүгүн кибер спортивнай турнир финала уонна робототехникаҕа, дроннары салайыыга, ракетаны көтүтүүгэ күрэхтэр буоллулар, творческай бырайыактары көрүү ыытылынна.
Бу күрэхтэр түмүктэринэн кыайыылаах оскуола көһө сылдьар кубогынан уонна бэстибээл генеральнай спонсора “Интеграция” хааччахтаммыт эппиэтинэстээх тэрилтэ (дириэктэр Григорьев Василий Николаевич) бирииһинэн наҕараадаланыаҕа. Оттон призердар үөрэх управлениета олохтообут бириистэрин тутуохтара.
Судьуйалар кимнээҕий?
Бэстибээл сүрүн судьуйута Игорь Васильевич Сивцев, С.К. Макаров аатынан Чурапчы гимназиятын информатикаҕа учуутала. Онтон кибер турнир сүрүн судьуйата – Иван Иванович Новгородов, үөрэх управлениетын информационнай технологияларга отделын сүрүнүүр специалиһа. Ракетомоделированияҕа – Прокопий Прокопьевич Неустроев, үөрэх управлениетын информационнай технологияларга отделын начальнига. Робототехника көрүҥэр – Евгений Вячеславович Прокопьев, С.А. Новгородов аатынан Чурапчы орто оскуолатын информатикаҕа учуутала; Квадрокоптердар күрэхтэригэр – Дьулус Семенович Павлов, С.К. Макаров аатынан Чурапчы гимназиятын эбии үөрэхтээһин педагога. Оттон айар куонкурус дьүүллүүр сүбэтин үөрэх управлениетын информационнай технологияларга отделын сүрүннүүр специалиһа Николай Васильевич Слепцов салайыаҕа.
Кыттааччылар таһымнара үрдүк!
Игорь Васильевич Сивцев, бэстибээл сүрүн судьуйата:
– Бу бэстибээл иккис сырыытын ыытыллар. Быйыл 60-тан тахса кыттааччылаахпыт. Хамаандалар күүстээхтик бэлэмнэнэн кэлбиттэр. Ааспыт сыллааҕы бэстибээлгэ тэҥнээтэххэ, таһымнара олус үрдээбит. Былырыыҥҥыттан киберспорт диэн саҥа хайысха киирбитэ. “Dota” уонна “CSGO” оонньууларга күөн көрсөллөр. Ону таһынан ракетомоделирование, квадрокоптердар көрүҥнэригэр эмиэ үгүс оҕо сөбүлээн кыттар. Робототехника көрүҥэ хайаан да ыытыллар. Быйыл өссө биир саҥа хайысха – Робобаскетбол киирдэ. Онон тэрээһиммит олус интэриэһинэйдик ыытыллан иһэр.
Оҕолор киберспортка наһаа сыһыаннаахтар эбит!
Ариан Максимов, VIII кылаас, Н.Д. Субуурускай аатынан Болтоҥо орто оскуолата:
– IT бэстибээлгэ биһиги оскуолабытыттан киберспортка, робототехникаҕа уонна дроҥҥа кытта кэллибит. Олус соһуйбутум диэн оҕолор киберспортка наһаа сыһыаннаах эбиттэр. Мин бэйэм дроҥҥа кыттыыны ыллым, бу көрүҥүнэн иккис сылбын дьарыктанабын. Маннык тэрээһиҥҥэ бастакыбын сырыттым, үчүгэй баҕайытык ыытыллан иһэр, наһаа талааннаах оҕолору кытта билистим, олус сэҥээрдим.
***
Уйгун Сивцев, VII кылаас, С.К. Макаров аатынан Чурапчы гимназията:
– Робототехникаҕа салайааччыбын кытта күүстээхтик дьарыктанан кыттыыны ыла кэллим. Тэрээһини олус сөбүлээтим, инникитин өссө кыттан иһиэхпин баҕарабын.
Ити курдук оҕолор бэстибээлгэ кыттан, робототехника, киберспорт, ракетостроение туһунан элбэх саҥа билиини-көрүүнү ылаллар. IT хайысхатынан сайдаллар. Ол аата биһиги дойдубут IT өттүгэр инникилээх.
Арина СОТНИКОВА, Алина МЕСТНИКОВА, Ира ШАДРИНА,
С.К. Макаров аатынан Чурапчы гимназиятын
X кылааһын үөрэнээччилэрэ, «Тумус кыһа» пресс-киин