«Бэлэм буол» хаһыат 1977 сыл алтынньы 2 күнүнээҕи нүөмэрэ. Хаһыат бастакы балаһатыгар «Бэчээккэ суруйтарыы саҕаланна» ыстатыйа бэчээттэммит. 1978 сылга бэчээккэ суруйтарыы алтынньы 1 күнүттэн саҕаламмытын уонна ахсынньы 1 күнүгэр диэри ыытылларын туһунан эппиттэр. Онон «Бэлэм буол» хаһыакка суруйтарыы бу билиҥҥи кэм курдук эмиэ хас оскуола ахсын ыытылла турар эбит.
«1976 сыл түмүгүнэн «Бэлэм буолга» тыа хаһаайыстыбатын оройуоннартан Уус-Алдан, Мэҥэ-Хаҥалас, Бүлүү, Сунтаар оройуоннара ордук үчүгэйдик суруйтарбыттара, – диэн ыстатыйаҕа бэлиэтээбиттэр, – Хоту оройуоннартан Муома, промышленнайдартан Усуйаана былааннарын аһары толорбуттара. Ордук үчүгэйдик суруйтарбыт Суотту (Уус-Алдан), Ороссолуода (Мэҥэ-Хаҥалас), II Күүлэт (Бүлүү) оскуолалара «Орленок» лааҕырга барар биирдии путевканан наҕараадаламмыттара».
Ол эрээри үгүс оройуоннар «Бэлэм буолга» суруйтарыы былаанын толорботохторун туһунан эмиэ ахтан ааспыттар. ЫБСЛКС обкомун бюрота (билиҥҥинэн ыччат министиэристибэтэ) 1978 сылга «Бэлэм буолга» суруйтарыы былаанын бигэргэппит. Онон пионер-активистары, эдэр корреспонденнары, бэчээти общественнай тарҕатааччыларын, оскуолалары «Бэлэм буолу» суруйтарыыны тэрээһиннээхтик ыыталларыгар эппиттэр. Суруйтарыы хаамыытын туһунан комсомол райкомугар, «Бэлэм буол» редакциятыгар биллэрэ туруҥ диэн ыҥырбыттар.
Этэрээккититтэн, кылааскытыттан 1978 сылга хас оҕо «Бэлэм буол» хаһыакка суруйтарда? Өссө кимнээх суруйтара иликтэр? Үөрэнэр оҕолоох ыалларга барыларыгар «Бэлэм буол» баар буолсу дуо? диэн ыйытыылары туруорбуттар.
«Бэчээккэ суруйтарыы саҕаланна» ыстатыйа бэчээттэммит күнүттэн 49 сыл ааспыт. «Кэскил» («Бэлэм буол») хаһыаппыт баар, бэчээттэнэр, сурутуу ыытыллар. Ыйытыы ис хоһооно уларыйбат:
2026 сыл икки аҥаарыгар хас оҕо «Кэскил» хаһыакка суруйтарда? Өссө кимнээх суруйтара иликтэр? Үөрэнэр оҕолоох ыалларга барыларыгар «Кэскил» баар буолсу дуо?
2026 сыл иккис аҥарыгар сурутуу https://podpiska.pochta.ru/press/ПБ573
кэскил14.ру