Балаҕан ыйын 23 күнүгэр «Малдьаҕар сиэннэрэ» патриотическай кулууп этэрээттэрин 8-11 кылааһын уолаттара Ампаардаах алааска сатыы хааман тахсан, айылҕаҕа сылдьыыга, сиэри-туому тутуһарга үөрэннибит.
Сарсыарда тоҕус чаастан оскуолаҕа мустаммыт айаммытыгар туруммуппут. Салайааччыларбыт Константинов В.А., Павлова А.П, учууталлар, мединструктор барсыбыттара. Улахан Аантан Ампаардаах 5 биэрэстэ ыраах сытар. Биһиги, уолаттар, ким даҕаны сылайдым диэбэккэбит үөрэ-көтө, кэпсэтэ-кэпсэтэ сатыы хааман тиийбиппит. «Саха Боотур» уһуйаан сиригэр биһигини Андрей Юльевич Артамонов көрсүбүтэ.
Тиийэн баран, бары бииргэ түмсэн олорон, Андрей Юльевич үөрэтэрин болҕойон истибиппит. Ол кэннэ уот оттоммут алаас иччилэрин алаадьынан, сылгы сиэлинэн уонна кымыһынан күндүлээбиппит. Ол курдук Андрей Юльевич тимиринэн уһаныы туһунан элбэх интэриэһинэйи кэпсээбитэ.
Андрей Юльевич уонна Богдан Слепцов толорууларыгар оһуохайдаабыппыт. Салгыы кыра сынньалаҥ кэнниттэн сыал ытан көрбүппүт. Бу сыал ытыы сүрүн соруга биһиэхэ бэлэмнэнии уонна боруобалааһын, ким сытыы харахтааҕын билии эрэ буолбакка, булт тэрилинэн киһи хайдах туттуохтааҕын туһунан билии буолбута. Бары биирдии буулдьанан ыппыппыт. Ытыалааһын түмүгэр 7 уол сыалы таппыт этэ, ол быыстарыгар мин киирэммин олус үөрбүтүм. Бу кэмҥэ биһиги салайааччыларбыт уонна барсыбыт учууталлар ас астыы сылдьаллара. Оскуола аһынан хааччыйбыта.
Ытыалаан бүтэн баран, алааспытыгар төннөммүт остуол тардынан, тото-хана аһаабыппыт. Аһаан бүтэн баран, былыргы өбүгэлэрбит, саха бухатыырдарын таҥастарын кэтэн элбэх хаартыскаҕа түспүппүт. Саха бухатыырын таҥаһын кэтэн олус астыммытым. Киһи бу курдук кэттэҕинэ өйө-санаата даҕаны уларыйар эбит дии санаатым. Андрей Юльевичка бу курдук биһиэхэ сүбэ-ама биэрбитигэр, барытын үчүгэйдик көрдөрбүтүгэр махтаммыппыт. Ол кэннэ илии тутуһан баран төптөрү Улахан Ааҥҥа төннүбүппүт.
Бу күн кэнниттэн мин маннык түмүккэ кэллим. Өбүгэлэрбит олорбут олохторун үөрэтэр, ол туһунан илэ хараххынан көрөр олус үчүгэй эбит. Бу күҥҥэ мин элбэҕи биллим, элбэххэ үөрэнним. Бу үөрэх миэхэ хайаан да туһалыаҕа. Уонна маннык тэрээһиннэр киһи өйүн-санаатын сааһылыыллар эбит, ол курдук киһиэхэ күүс биэрэллэр эбит диэн этиэхпин баҕарабын. Маннык тэрээһиннэри элбэхтик ыытыахха наада дии саныыбын. Уонна Андрей Юльевич Артамоновка уонна салайааччыларбар маннык тэрээһини тэрийбиттэригэр, интэриэспитин тардыбыттарыгар улаханнык махтанабын.
Аман Еремеев, М.Е.Васильева аатынан 2 Малдьаҕар орто оскуолатын 11 кылааһын үөрэнээччитэ, «УОТ» медиакиин