Өрөспүүбүлүкэбит оскуолаларыгар сылын ахсын учуутал тиийбэтиттэн кыһалҕа үөскүүр. Оттон Горнай улууһун Сэмэн Данилов аатынан Бэрдьигэстээх орто оскуолатыгар маннык кыһалҕа баар дуо?
Бүгүҥҥү биһиги ыалдьыппыт — оскуола дириэктэрэ Павел Алексеевич Петров.
Кини кэккэ биридимиэттэри дириҥэтэн үөрэтэр биир бастыҥ оскуолаҕа номнуо төрдүс сылын үлэлии сылдьар. Бэйэтэ идэтинэн история учуутала. Оскуолаҕа кадр боппуруоһугар ыйытыыларга хоруйун сиһилии видеосюжекка көрүҥ.
Павел Алексеевичтан эбии идэтин саҥа баһылыы сылдьар эдэр педагогтарга уопуттаах учууталлар уһуйууларын (наставничество) туһунан санаатын үллэстэригэр көрдөстүбүт.
— Билиҥҥи туругунан биһиги оскуолабытыгар биэс наставник учуутал баар. Хас биирдиилэрэ аччаабыта биирдии эдэр учууталы илдьэ сылдьаллар. Уруоктарын ыыталларыгар эрэ буолбакка, учуутал быһыытынан бэйэлэрин сайыннаралларыгар, таһымнарын үрдэтэллэригэр, саҥа саҕахтары арыналларыгар төһүү күүс буолаллар. Мин саныахпар, бу олус үчүгэй сүүрээн. Мин бэйэм саҥа учууталлыыр сылларбар оннук бырагыраама суох этэ. Сүбэлиир-амалыыр киһим суоҕа, билигин санаатахха, хомолтолоох эбит. Ол гынан баран, бииргэ үлэлээбит-алтыспыт коллегаларым, дьонум бары миэхэ кыралаан сүбэ-ама, холобур буолбуттара.
Салайааччы быһыытынан, эдэр учууталларга туох баҕа санаа, сүбэ этиэҥ этэй?
— Учуутал, педагог үлэтин сөбүлүөхтээх, үөрэтэр оҕолорун таптыахтаах. Үлэни үлэ курдук көрүмүөххэ наада. Оҕолору кытары биир халыыпка, биир турукка киирэн үлэлээтэххэ, сыһыаныҥ да тосту уларыйыа дии саныыбын. Учуутал саамай үрдүк ситиһиитэ – үөрэтэр оҕотун ситиһиитэ.
Кэпсэттэ Кирилл Иванов, видеоҕа уһулла Сандаара Егорова, «Сайдам» медиакиин юнкордара, Бэрдьигэстээх, Горнай