Мин хос эһэм Хоютанов Егор Артемьевич 1927 с. Уус-Амма нэһилиэгэр Чараҥҥа төрөөбүтэ. Бииргэ төрөөбүт бэһиэ этилэр.
1936 с. Чымынаайы начаалынай оскуолатыгар үөрэнэ киирбитэ, онтон 1942 с. Чычымах 7 кылаастаах оскуолатын үөрэнэн бүтэрбитэ.
Аҕа дойду Улуу сэриитигэр, 1943 с. колхуоска үлэтин саҕалаабыта. Убайдара Петр, Дмитрий фроҥҥа барбыттара. Нэһилиэккэ оҕолор, дьахталлар, кырдьаҕастар эрэ хаалбыттара. Колхуос бары үлэтэ-хамнаһа кинилэргэ сүктэриллибитэ. Оҕолор от мунньар этилэр. Декадаҕа кыттан уолаттар от үлэтин кэмигэр куҥҥэ 1 га сири охсор этилэр. 1943 с. от ыйын 22 күнүнээҕи «Таатта» хаһыакка өссө үчүгэйдик үлэлиэм диэн ыстатыйата тахсыбыта. Онно: «от хомуурун үлэтин бастакы күннэриттэн ыла нуормабын 1,5-2 тегул толортуубун. Үчүгэйдик үлэлиирим иһин колхуоһум мигин от охсуутугар анаата», — диэн суруйбута.

Сэрии кэнниттэн почтаҕа дьаамсыгынан үлэлээбитэ. 2 сыл Ааллаахха таһаҕас таһыытыгар сылдьыбыта. 1953 с. 2 сыл кыладыапсыгынан үлэлээбитэ. 1955-1972сс. диэри колхуоска, сопхуоска биригэдьииринэн үлэлээбитэ. Үксү хонуу биригэдьиирэ этэ. Урут биригэдьиирдэр дьиэни кэрийэ сылдьан дьону үлэлэтэллэрэ. Сайынын окко хас суотай сири охсубуккун, муспуккун суруйан иһэллэрэ. Күһүн, оттоммут сири кэрийэ сылдьан, оту мээрэйдииллэрэ. Пиэрмэҕэ субан сүөһү ыйааһынын хас ый аайы кэмнииллэрэ. Онон биригэдьиир үлэтэ ыарахан, сыралаах үлэ уонна дьону кытта биир тылы булары ирдиирэ. 20 сыл нэһилиэк сэбиэтин дьокутаатынан быыбардаммыта.
1952 сыллаахха Чымынаайыга Попова Лидия Семеновнаны кэргэн ылбыта, биэс оҕоломмуттара.
1972 с. улаханнык ыалдьан, үлэтиттэн тохтообута. Доруобуйата арыый көнөн, 1976-1987 сс. диэри сопхуоска кадровай булчутунан үлэлээбитэ.
Тыыл бэтэрээнэ Егор Артемьевич 1987 сыллаахха ыалдьан олохтон туораабыта.
Уһун сыралаах үлэтин иһин Егор Артемьевич 19 сааьыгар 1946 с. «Аҕа Дойдуну көмүскүүр Улуу сэрии 1941-1945 сс. килбиэннээх үлэтин иһин», «Үлэ бэтэрээнэ» мэээллэринэн, 1966 с. кулун тутар 22 күнүгэр «Бочуот бэлиэтэ» уордьанынан, араас бэлиэлэринэн, махтал суруктарынан наҕараадаламмыта.

Хос эһээбинэн киэн туттабын! Үрдүк аатыгар сүгүрүйэбин!
Нелли Хоютанова, Г.Д.Бястинов-Бэс Дьарааһын аатынан
Чымынаайы орто оскуолатын юнкора,Таатта
keskil14