Алтынньы 21 күнүгэр С.З.Борисов аатынан Тыыллыма орто оскуолатыгар үгэс буолбут «Уол оҕо-кус быһый, ат бөҕө» диэн уолаттарга аналлаах күрэхтэһии буолан ааста. Күрэххэ 1 кылаастан саҕалаан оскуола бары уолаттара көхтөөх кыттыыны ыллылар. Кинилэр 4 бөлөххө арахсан илиилэрин-атахтарын эрчимин көрдөрөр сэттэ түһүмэҕинэн күөн көрсүстүлэр: “Көтөх ынаҕы туруоруу”,”Тутум эргиир”, “Кырынастааһын”, “Хороҥ оту үрдүнэн ойуу”, “Ойбонтон уулааһын”, “Суоска тэбии”, “Кириэс тэбии” курдук норуот оонньууларын дьоҥҥо-сэргэҕэ көрдөрдүлэр. 1 бөлөх хамандыыра- Дайбанныров Айтал (10 кылаас), 2 бөлөххө — Дорофеев Айаал (8 кылаас), 3 бөлөххө — Спиридонов Егор (8 кылаас) уонна 4 бөлөххө — Винокуров Давид (10 кылаас).
Тэрээһин “Үнүгэс» үҥкүү бөлөҕүн (салайааччы -Назарова И.И.) эҕэрдэ нүөмэринэн саҕаланна. Уоланнар күрэхтэһиэхтэрин иннинэ алгыс истэн, санааларын бөҕөргөттүлэр.
Оонньуу судьуйаларынан учууталлар уонна оскуола үлэһиттэрэ буолбуттара. Хас биирдии уол төһө очко хомуйбутунан бааллара ааҕыллан, түмүллэн испитэ. Дьүүллүүр сүбэ түмүк таһаарар кэмигэр «Сайдыс» оҕо түмсүүтэ кыраларга араас оонньуулары оонньотто, сэргэхситтэ. Тыҥааһыннаах күрэхтэһии кэнниттэн муҥутуур кыайыылаахтар ааттара ааттанна: алын сүһүөх кылаастарга — 2 кылаас үөрэнээччитэ Петров Тимур, орто сүһүөххэ — 7 кылаас үөрэнээччитэ Кириллин Мирослав, үрдүкү кылаастарга — Дайбанныров Айтал, 10 кылаас үөрэнээччитэ кыайыы өрөгөйүн биллилэр. Түһүмэхтэринэн элбэх очко ылбыт уолаттар эмиэ бэлиэтэнэн санаалара көтөҕүлүннэ, инникитин кыттарга эрэллэрэ улаатта. Кыттыбыт уолаттарга барыларыгар кыргыттар үтэһэлээх эт уонна туоһу сурук туттардылар.
Алын сүһүөххэ муҥутуур кыайыылаах Тимур Петровка аҕыйах ыйытык биэрэн маннык хоруй ыллыбыт:
“Мин саамай ыарырҕатар көрүҥүм тутум эргиир, тоҕо диэтэххэ миэхэ күүһүм тиийбэт дии саныыбын. Былырыын буолбут күрэххэ, хомойуох иһин, мин ханнык көрүҥнэргэ миэстэлэспиппин өйдөөбөппүн. ”Уол оҕо кус быһый, ат бөҕө” диэн күрэхтэн уол оҕо күүһэ сайдар дии саныыбын. Кыттар уолаттарга мин баҕарабын ситиһиини, дьулууру!”
Күрэхтэһии кыттааччыта 8 кылаас үөрэнээччитэ Дорофеев Айаал маннык күрэхтэһиилэртэн уол оҕо күүһэ, кыаҕа уонна тулуура сайдар дии саныырын этэр, сылын аайы ыытыллар күрэхтэһииттэн бэйэтигэр араас эбиллиилэри көрөрүн кэпсиир.
Бу тэрээһин биһиги оскуолабыт уолаттарыгар саҥа саҕахтары арыйдын, санааларын кынаттаатын. Билиҥҥи үйэҕэ саха төрүт оонньуута сайда турдун!
Амина Игнатьева ,10 кылаас,
С.З.Борисов аатынан Тыыллыма орто
оскуолатын «Урсун» медиа-киинин кэрэспэдьиэнэ
Хаартыскаҕа түһэрдэ: Света Никифорова,
10 кылаас үөрэнээччитэ
Кэскил14.ру