2026 сыл сааһыгар Арктика эргимтэтигэр сытар Эбээн Бытантай национальнай улууһун И.Н. Слепцов аатынан Кустуур орто осколатын «Мэрлэнкэ» сааскы-сайыҥҥы көс оскуолата быйыл 6-с сылын оҕолору таба ыстаадатыгар баран үлэлэтэр. Быйыл оҕолорбут табаһыттарга улахан күүс- көмө буоллулар. Оҕолор муус устар 22 күнүгэр оскуола директора Матрена Алексеевна Горохова, буранистарбыт физическэй культура учуутала Василий Андреевич Попов, Иннокентий Егорович Колесов, производственнай маастар Василий Нестерович Филиппов, кэлин биир төрөппүт Роберт Иннокентьевич Старостин буолан, 10 көстөөх сиргэ, таба сааһыыр Чинэндьэ диэн сиргэ буранынан оҕолору тиэрдэн, оҕолор наставник табаһыттары, сири-уоту кытта билсэн, дьиэ табатын билсэн олохторун булбуттара.
Маҥнайгы күннэриттэн оҕолор үлэлэрин быыһыгар үөрэхтэрин салгыы үөрэммиттэрэ, оскуола учууталлара оҕолорго сорудах ыытан, оҕолор бары үөрэхтэригэр эппиэтинэстээхтик сыһыаннаһан бары үөрэхтэрин үчүгэйдик түмүктээбиттэрин истэн үөрбүттэрэ.
Быйыл ыстаадабыт сиригэр адьырҕа да кыыл элбэҕэ, уһун да кутуруктаах үксэ сөхтөрдө. Оҕолор хаһан да харахтаабатах кыылларын илэ көрөннөр сөхтүлэр.
Биригэдьиир салайааччынан удьуор табаһыт Альберт Владимирович Колесов үлэлиир. Оҕолору, үлэһиттэри сөптөөхтүк аттаран туруоран, сатабыллаахтык дьаһайан, сааскы кэмҥэ тугут төрүөҕүн ылыы хампаанньатын, сайыҥҥы кэмҥэ табаны тыыннаахтыы иитиини энчирэппэккэ көрдүлэр-иһиттилэр.
Сайын устата бостуук-үөрэнээччи быһыытынан эппиэттээх үлэҕэ күүскэ, бэйэлэрин холлоругар наставниктарын кытта тэҥҥэ үлэлэһэн кэллилэр. Наставниктарынан: Аял Васильевич Колесов, Эдуард Эдуардович Заровняев, Владимир Васильевич Стручков, минньигэс аһынан сайын устата аһатта чуум үлэһитэ Аида Валерьевна Колесова.
Атырдьах ыйын 27 күнүгэр Үөрэҕирии министиэристибэтин вертолетунан оҕолору улуус киинигэр диэри таспыттара, онтон киэһэ рейсовай оҥорон оҕолор дьиэлэригэр Кустуурга кэлбиттэрэ. Онон үөрэх дьылын хойутаабакка, бэлэмнээх көрүстүлэр. Оҕолору кытта оскуолаттан производственнай үлэ маастара, педагог Валентина Николаевна Колесова уонна нэһилиэк кырдьаҕас ветерана, культура үлэһитэ, нэһилиэк бибилитиэкэрэ Мария Иннокентьевна Саргина саас-сайын оҕолору көрөн-истэн сырытыннардылар.
Көс оскуола оҕолоро, быйыл уопсайа 8 оҕо, хоту ыстаадаҕа «Кочевник-1» сырыттылар: С. Алеша — 10кыл., К. Сарыал, С. Вася, С. Проня, С. Егор — 8 кылаас үөрэнээччилэрэ, Г. Сема, С. Афоня — 5 кылаас уонна Г. Вова — 4 кылаас. Оттон ИП КФХ Р.Н. Горохова «Турукаан» ыстаадатыгар 4 оҕо: И. Коля — 2кыл., Г. Миша — 3кыл., С. Саша — 8кыл., Г. Ранид — 10кыл. «Кочевник-2» (салайааччы Слепцов М.П) ыстаадаҕа: 1 оҕо — 10 кылаас үөрэнээччитэ Р. Тапталыына сырыттылар. Быйыл сайыҥҥы сынньалаҥнарын туһалаахтык таба иитэр ыстаадаҕа уопсайа 13 оҕо сылдьан, үөрэнэн, үлэлээн атаардылар.
Оҕолор сааскы-сайыҥҥы кэмҥэ, табаһыт илии тиийбэт кэмигэр, улахан сүдү күүс буоллулар. Быйыл табаһыттарбыт, наставниктарбытыгар үлэһит илии тиийбэт буолан, оҕолор тиийээт, улахан киһилии эппиэтинэстээхтик сыһыаннаһан, эттэринэн-хааннарынан билэн, күнүстэри-түүннэри табаһыт ыарахан үлэтин кытта билсэн, эппиэтинэстээхтик үлэлээн кэллилэр.
Манна сылдьыбыт оҕолор астынан-дуоһуйан, үлэҕэ үөрэнэн, таба иитиитин сайыҥҥы үлэ ымпыгын-чинчигин кытта ыкса билсэн, киэҥ сири-дойдуну сөҕө, араас көрбөтөх кыылларын эт харахтарынан көрөн, табаһыт кытаанах үлэтигэр үөрэнэн, элбэҕи билэн-көрөн астынан кэллилэр. Бу оҕолор 4 ыйы быһа, кырдьык, патриоттуу сыһыаннаһан, баҕа өттүнэн үлэлии барбыттара. Дьиэ кэргэн экономикатыгар элбэх оҕолоох, кыаллыбат, үлэтэ-хамнаһа суох дьоҥҥо бу оҕолор төрөппүттэригэр сайыҥҥы үлэлэрэ төһүү күүс буолла. Таба ыстаадатыгар үлэлээбит оҕолор күһүн хамнас аахсан үөрүүлэрэ үксээтэ.
Саҥа сонун билиилээх кэлэннэр үөрэхтэригэр өссө туруулаһан туран үөрэнихтэрэ, дойдулара сайдарын туһугар элбэх билиилээх дьон буолан тахсыахтара диэн эрэнэбин.
Табаһыттарбытыгар күүстээх санааны ылынан, бачча тухары көрөн-истэн аҕалбыт кыылларбыт, эһиги илиигит сылааһынан, сүрэххит баҕатынан, күнүстэри-түүннэри күүстээх үлэҕэ бэйэҕитин харыстаабакка табаны ииппиккитигэр, элбэтэ тураргытыгар Махтал буоллун! Өбүгэлэрбит харыстаан хаалларбыт маанылаах кыылбыт-табабыт улууспутун ааттатар буола өссө сайдан, элбээн, эдэр ыччат киэн тутта үлэлиир биир сайдыылаах салаа буоларыгар баҕарабын.
Интервьюну биэрдэ И.Н. Слепцов аатынан оскуола производственнай маастара В.Н. Колесова,
Интервьюну ылла Тапталыына Рожина, 11 кылаас, Кустуур, Эбээн Бытантай