«Кэнчээри» норуот ансаамбыла VIII бүтүн дойдутааҕы «Арассыыйа оҕолоро ыллыыллар (Поют дети России)» хор бэстибээлин түмүктүүр киэһэтигэр, Кострома куоракка кэнсиэргэ саха култууратын көрдөрөн, Оһуохай киирии чааһын толордо.
Оҕолор хомустаан, кылыһахтаан, Арассыыйа култууратын устуоруйатыгар хаһан да буолбатах кэрэ уонна ураты түгэни бэлэхтээтилэр. Таһаарааччы — Сардаана Дьяконова, хомусчут — Эллина Цой, кынат кыргыттар: Вика Терехова, Дамира Дорофеева, Амелия Филиппова.
Бэстибээл түмүктүүр түһүмэҕэр 15 хор кэлэктиибэ, 400 оҕо кытынна. Манна биһиги ансаамбылбыт Уһук Илин уокуругун чиэһин көмүскээтэ.
Бэлиэтээн эттэххэ, «Кэнчээри» ансаамбыл 1972 сыллаахха Василий Степанович Парников көҕүлээһининэн Уус Алдан улууһун Мүрү аҕыс кылаастаах оскуолатын иһинэн тэриллибитэ. Оччолорго Саха сиригэр бастакы академическай хор кэлэктиибэ буолбута. Билигин В.С. Парников аатынан «Кэнчээри» эстетическэй киин иһинэн үлэлиир.
Ансаамбыл «Норуот үгэстэрин харыстааһын иһин» диэн дипломунан наҕараадаланна. Күндү оҕолорбутугар, уһуйааччыларыгар инникитин өссө үрдүк ситиһиилэри, дабайыылары баҕарабын. Саха Өрөспүүбүлүкэтигэр Култуура сылыгар оҕолорбут ситиһиилэрэ өссө биир чаҕылхай түгэнинэн буолла.
Афанасий Иванович Ноев МAX-канаалыттан