Балаҕан ыйын 19 күнүгэр С.П. Данилов аатынан Бэрдьигэстээх орто оскуолатын үөрэнээччилэрин икки ардыларыгар сыллата ыытыллар «OCEHЬFEST — 2026» («Көмүс күһүн») диэн биир саамай кэтэһиилээх тэрээһин буолан ааста. Быйылгы бырааһынньык девиһэ — «Айабыт. Сэргэхситэбит. Сөхтөрөбүт!».
Тэрээһин сүрүн сыалынан үөрэнээччилэр айар дьоҕурдарын сайыннарыы, хамаанданан үлэ сатабылларын чиҥэтии уонна төрөөбүт дойдуга, айылҕаҕа харыстабыллаах сыһыаны иитии буолар.
Бэстибээл хас да былаһаакканан уонна хайысхаларынан ыытылынна. Оҕолору, төрөппүттэри уонна учууталлары түмтэ.
Быйылгы бэстибээл сонун көстүүтүнэн араас саастаахтарга аналлаах туспа маршруттарынан ыытыллыыта буолла:
Ол курдук,
— Алын кылаастар (1–4 кылаастар):
Кырачааннар төрөппүттэрин кытары «Көмүс күһүн» диэн ааттаах улахан атыы-дьаарбаҥкаҕа көхтөөхтүк кытыннылар. Оҕолор учууталларын уонна төрөппүттэри кытта сүбэлэһэн, минньигэс бурдук аһылыктан саҕалаан, илиинэн оҥоһукка тиийэ ас-үөл атыылаатылар. Итини таһынан, кинилэргэ анаан «Күһүҥҥү креатив» («Осенний креатив») диэн мастарыскыайдар марафоннара ыытылынна. Уолаттар-кыргыттар ойуулуур-дьүһүннүүр искусствоттан пластилинынан моделированиеҕа тиийэ талбыт хайысхаларыгар дьарыктанан, фантазияларын байыттылар. Күн бүтүүтэ спортивнай былаһааккаҕа күүрээннээх эстэпиэтэ тыҥааһыннаахтык барда.
— Орто сүһүөх (5–7 кылаастар):
Орто кылаастарга эмиэ туспа эйгэ тэриллибит. Кинилэр бастаан бэйэлэрин бородууксуйаларын көрдөрөн атыылаатылар, онтон оскуола устун тарҕанан, «Күһүн көмүс дьыалата» («Дело золотой осени») диэн детективнэй квест-оонньууга кытыннылар. Хамаандалар кистэммит сорудахтары булан, оскуола устун суолу-ииһи чинчийэн, мындыр толкуйдарын эрэйэр моһоллору туораатылар.
— Үрдүкү кылаастар (8–11 кылаастар):
Улахан кылаас оҕолоро аныгы технологиялары баһылаабыттарын көрдөрдүлэр. Кинилэргэ анаммыт «Күһүн 60 сөкүүндэ иһигэр» (Осень за 60 секунд») диэн видеоролик күрэҕэр олус интэриэһинэй үлэлэр киирдилэр. Сорохтор успуорт, чөл олох тиэмэтигэр социальнай ролик устубуттар, атыттар муусука клибин уһуллулар, оттон үһүстэр экология боппуруостарын таарыйар сюжеттары көрдөрдүлэр. Бу үлэлэр киэһэлик дьүүллүүр сүбэ иннигэр экраҥҥа көһүннүлэр.
Маны тэҥэ, бары кылаастарга дьиэтээҕи сорудах бэриллибит:
1. «Күһүн — хаартыскаҕа» («Осень в кадре») диэн хаартыска күрэҕэр үгүс кылаас кытынна. Манна ким да искусственнай интеллект өҥөтүн туһаммакка, барыта дьиҥнээх түгэни объективка үйэтэппитэ хайҕанна. Үлэлэр А4 кумааҕыга бэчээттэнэн быыстапкаҕа турдулар.
2. Саха норуодунай поэта Семен Данилов төрөөбүтэ 110 сылыгар аналлаах «Данилов — айылҕа палитрата» диэн күрэххэ оҕолор айылҕа матырыйаалыттан (мастан, сэбирдэхтэн, сиэмэттэн) араас композициялары, паннолары уонна хартыыналары оҥорон аҕаллылар. Бу үлэлэр поэт төрөөбүт дойдутун таптыыр лирикатын кытта дьүөрэлэһэн, түмэлгэ турбут курдук кэрэ көһүннүлэр.
Түмүктэр уонна инники былааннар
Дьүүллүүр сүбэ үлэлэри сыаналаан баран, бастыҥнары дипломнарынан уонна бириистэринэн наҕараадалаата. Ол эрээри, тэрийээччилэр этэллэринэн, манна кыайыы-хотуу буолбакка, оҕолор доҕордоһуулара, биир сомоҕо буолуулара ордук суолталаах.
— Биһиги оскуолабытыгар маннык тэрээһиннэр ыытыллаллара олус үчүгэй. Оҕолорбут харахтара умайан, бэлэмнэнэ сылдьалларын көрөн киһи үөрэр. Айылҕа матырыйаалыттан оҥоһуктар, видеоролигы устуу — бу барыта билиҥҥи кэм ирдэбилэ. Оҕолорбут сайдан иһэллэр, — диэн тэрийээччи, дириэктэри иитэр үлэҕэ солбуйааччыта Ольга Алексеевна Пахомова санаатын үллэһиннэ.
«OCEHЬFEST — 2026» оскуола историятыгар биир чаҕылхай түгэнинэн буолла. Тэрийээччилэр быйылгы бырааһынньык табыллыбытынан астыммыттарын биллэрэн, эһиилги сылга өссө саҥа идиэйэлэри, саҥа куонкурустары киллэрэр былааннаахтарын туһунан иһитиннэрдилэр.
Сиһилии видео-роликка көрүҥ:
Бэлэмнээтилэр Алина Петрова, Арина Лаптева, «Сайдам» медиакиин юнкордара, С.П. Данилов аатынан Бэрдьигэстээх орто оскуолата, Горнай