Быйыл Саха Өрөспүүбүлүкэтин Сэрии, Тыыл уонна Үлэ бэтэрээннэрин уопсастыбаннай тэрилтэтэ 40 сыллаах үбүлүөйүн бэлиэтиир. Өрөспүүбүлүкэтээҕи бэтэрээннэр Сэбиэттэрин Знамятын эстафетатын чэрчитинэн, өрөспүүбүлүкэ таһымыгар саҕаламмыт хамсааһын биһиги улууспутугар киэҥ далааһыннаахтык ыытылла турар.
Ол курдук, бүгүн, балаҕан ыйын 22 күнүгэр, бу дьоһуннаах түгэн Н.Е. Мординов-Амма Аччыгыйын аатынан Харбалаахтааҕы үөрэхтээһин холбоһугар олус долгутуулаахтык ааста. Тэрээһиммит күндү ыалдьыттарынан буоллулар нэһилиэкпит киэн туттар ытык кырдьаҕастара, үлэ бэтэрээннэрэ, бэтэрээн учууталларбыт. Ытык дьоммут мустан, эдэр көлүөнэни кытары атах тэпсэн олорон ирэ-хоро сэһэргэстилэр.
Тэрээһин үөрүүлээх чааһа эстафета Знамятын долгутуулаах көрсүһүүтүттэн саҕаланна. Знамяны киллэрэр сүҥкэн чиэскэ оскуолабыт 8 кылааһын Знаменнай группата тигистэ. Уолаттар Знамяны дьоһуннаахтык туттан, дьоһумсуйан туран чиҥник үктэнэн хааман киллэрэн, саалга мустубут дьон кутун-сүрүн туттулар, тэрээһин суолтатын арыйдылар.
Буола турар долгутуулаах түгэн сүрүн чааһын Орто Амма нэһилиэгин администрациятын баһылыгын солбуйааччыта Анна Ивановна Васильева саҕалаата. Кини эҕэрдэ тылыгар билиҥҥи кэмҥэ дойдуга таптал уонна историяны ытыктааһын — бу көлүөнэлэр ситимнэрэ, инникигэ эрэллээх буолуу сүрүн төрдө диэн тоһоҕолоон бэлиэтээтэ.
Үөрүүлээх тэрээһиммитигэр Харбалаахтааҕы Бэтэрээннэр сэбиэттэрин бэрэссэдээтэлэ Светлана Петровна Винокурова Знамяны өлбөт-сүппэт өйдөбүнньүк диэн сыаналаата. Кини Аҕа дойду Улуу сэриитин, тыыл хорсун үлэтин кыттыылааахтарын уонна олорон, үлэлээ-хамсаан ааспыт дьоммут сырдык ааттарыгар сүгүрүйүү — бу хас биирдиибит ытык иэспит диэн тоһоҕолоон эттэ. Кини оҕолорго Бэтэрээннэр сэбиэттэрин историятын кэпсээтэ: бу тэрилтэ эйэлээх олоҕу тутуспут көлүөнэни түмэр, исторяны үйэтитэр уонна үүнэр ыччакка патриотизм тыынын иҥэрэр сүрүн соруктааҕын бэлиэтээтэ.
Линейка саамай долгутуулаах түгэнигэр ыҥырыылаах ытык кырдьаҕастарбытыгар, үлэ бэтэрээннэригэр, бэтэрээн учууталларбытыгар холбоһукпут дириэктэрэ Любовь Аркадьевна ис сүрэҕиттэн эҕэрдэлээн туран, махтал тыллары эттэ уонна холбоһук аатыттан сэмэй бэлэхтэри туттарда. Олохторун, үлэлэрин-хамнастарын нэһилиэк, улуус сайдыытыгар анаабыт, билигин даҕаны эдэр ыччакка чаҕылхай холобур буолар ытык дьоммутуттан биирдэстэрэ — үлэ бэтэрээннэрэ: Виктор Васильевич Протопопов, Евдокия Трофимовна Протопопова, Прасковья Кирилловна Дайбаннырова. Ыллыктаах тылларынан, алгыстарынан эдэр көлүөнэҕэ барҕа махталларын, баҕа санааларын тиэртилэр. Эйэ, хорсун быһыы иһин олохторун толук уурбут дьоммут кэриэһигэр Чуумпуруу мүнүүтэтэ биллэрилиннэ. Чуумпуруу мүнүүтэтигэр мустубут дьон, үөрэнээччилэрбит бары төбөлөрүн төҥкөтөн, оччотооҕу көлүөнэ модун санаатыгар, хорсун быһыытыгар сүгүрүйдүлэр.
Ыҥырыылаах ыалдьыттарбытыгар истиҥ эҕэрдэ ырыаларын 3-с кылаас үөрэнээччилэрэ бэлэхтээтилэр. Дириҥ ис хоһоонноох долгутулаах тэрээһиммит «Таатта Амматын таптыыбын» диэн патриотическай ырыаны ыллаан, бары бииргэ туран, төрөөбүт дойдуга тапталы биллэрэн, өрө көтөҕүллүүлээхтик түмүктээтибит. Ол кэнниттэн оскуола үөрэнээччилэрэ ытыктабыллаах бэтэрээннэри, нэһилиэк тумус туттар дьонун кылаастарын чааһыгар ыҥыран, ирэ-хоро кэпсэттилэр, санаа атастастылар. Хас биирдии көрсүһүү сылаас, истиҥ эйгэҕэ, аһаҕас сэһэргэһии быһыытынан барда, оҕолор элбэҕи биллилэр-көрдүлэр.
Түмүккэ, үйэлэри ситимниир Эстафета салҕанар. Өрөспүүбүлүкэтээҕи бэтэрээннэр Сэбиэттэрин Знамята салгыы Чымынаайы нэһилиэгэр айаннаата. Бүгүҥҥү күнтэн биһиги сүрэхпитигэр саҥа кыым умайда, олохпутугар сыал-сорук өссө дириҥээтэ. Ытыктыыр, убаастыыр дьоммут-бэтэрээннэрбит олохторун холобурунан сирдэтэн, дойдубут чэчирии сайдарын туһугар үөрэниэхпит, үлэлиэхпит-хамсыахпыт!
Умнуллубат күнү, түгэни бэлэхтээбит күндү дьоммутугар барҕа махтал!
Варианна Макарова, Харбалаахтааҕы үөрэхтээһин холбоһугун директоры иитэр үлэҕэ солбуйааччы, Таатта