Александр Иванович Федотов билигин төһө да биһиги кэккэбитигэр суоҕун иһин кини туһунан үтүө өйдөбүлү Хадаар хас биирдии олохтооҕо илдьэ сылдьар. Александр Иванович биһиги Хадаарбытыгар икки этээстээх таас оскуоланы туттарбыта. Оскуолабытыгар кини олоҕун туһунан кэпсиир анал муннук баар. Онон хас күн аайы Александр Иванович Федотовы кытта алтыһан ааһабыт.
Оскуолабытыгар Александр Иванович аатынан физика, математика предметтэригэр дьоҕурдаах оҕолорго аналлаах “Федотовскай ааҕыылар” ыытыллаллар. Быйыл бу куонкурус бэһис төгүлүн ыытылынна.
Александр Иванович олоҕун аргыһа ырыа айааччы Марианна Ивановна Федотова-Намыына ийэтэ Мария Елисеевна Макарова (Анемподистова) уонна Василий Елисеевич кыыһа Хадаар Герой-Ийэтэ Елена Васильевна Лукина эдьиийдии-балыстыылар.
– Бэйэбин өйдүөхпүттэн ыла Хадаарга наар сылдьар этибит. Сир астаан, ийэлэрбит сайылыктарынан сылдьан оҕо сааһым саамай кэрэ өйдөбүллэрэ Хадаары кытта ситимнээхтэр, – диэн кэпсиир Марианна Ивановна.
Дьоҥҥо үтүөнү оҥорор, көмөлөһөр диэн наһаа улахан суолталаах. Оскуолабытыгар баар А.И. Федотовка аналлаах муннукка “Үйэлээх махтал, үтүө киһиэхэ” диэн суруллан турар.
Бу мээнэҕэ суруллубатах тыллар. 2010 сыллаахха икки этээстээх таас оскуолабыт кини улахан өйөбүлүнэн, кини сүүрэн-көтөн туттарбыт оскуолата буолар. Ол үтүө көмөтүн, үгүс сыллар ааспыттарын да кэннэ, Хадаар дьоно умнубат, махталлаах санаатын илдьэ сылдьар.
– Мин Хадаар дьонугар Александр Иванович үтүө аатын умнубакка өйдүү-саныы, кини аатын үрдүктүк тутан илдьэ сылдьалларыгар наһаа махталлаахпын, – диэн этэр Марианна Ивановна.
Александр Иванович улахан дуоһунастарга үлэлээбит киһи. Кини оскуолабыт бочуоттаах мецената, “Республикатааҕы инвестиционнай компания (РИК)” бастакы генеральнай дириэктэрэ, Россия бочуоттаах тутааччыта, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Чурапчы улууһун, Чурапчы, Одьулуун, Хадаар нэһилиэктэрин бочуоттаах гражданина.
Олоҕун аргыһа Марианна Ивановна ахтарынан, Александр Иванович наһаа холку, мындыр, киэҥ толкуйдаах, дьиҥнээх саха эр киһитэ этэ. Үлэтигэр наһаа бэриниилээх, үлэтинэн олорбут. Төһө да улахан үлэҕэ сырыттар, дьиэтигэр-уотугар, оҕолоругар олус болҕомтолоох. Марианна Ивановна уонна Александр Иванович Чурапчы орто оскуолатыгар бииргэ үөрэммиттэр. Марианна Ивановна киниттэн икки сыл балыс.
Саха өрөспүүбүлүкэтин мелодистарын сойууһун чилиэнэ, Чурапчы улууһун ырыа айааччыларын түмсүүлэрин салайааччыта Марианна Макарова-Барахсаана Федотовтар дьиэ кэргэттэрин чугас, истиҥ киһилэр буолар. Кинилэр үһүөн биир кэмҥэ Чурапчы орто оскуолатыгар үөрэммиттэр. Марианна Ивановналыын иккиэн “Дьиэрэҥкэй” оҕо ансаамбылыгар дьарыктаммыттар. Иккиэн тохсунньу ыйга күн сирин көрбүттэр. Иккиэннэрин ийэлээх аҕалара 40, 50 саастарын ааһан баран кыргыттарыгар күн сирин бэлэхтээбиттэр.
– Биһиги кэргэттэрбит иккиэн уу тэстибэт доҕордуулар этилэр. Дьиэ кэргэнинэн сүрдээх истиҥ доҕордуу сыһыаннаах этибит. Александр Иванович курдук үтүө киһини кытта алтыһан, доҕордоһон кэлбит дьоллоох дьоммут. Доҕордуу сыһыан диэн хас биирдии киһиэхэ олус күндү, – диэн санаатын үллэстэр Марианна Макарова-Барахсаана.
Алена НОЕВА, VIII кылаас,
С.Д. Флегонтов аатынан Хадаар орто оскуолата, Чурапчы