Бүтүн Арассыыйатааҕы «Ыччат уонна оҕолор» национальнай бырайыак чэрчитинэн ыытыллар оскуолалар быыһыыр этэрээттэрин III-с күрэһин уокуруктааҕы түһүмэҕэр барыта 11 регион кыттара күүтүллэр. Уокуруктааҕы бастакы түһүмэх түмүгүнэн Саха сириттэн 4 этэрээт ыҥырыллыбыта.
Ол иһигэр улахаттарга (16-17 саастаахтарга) Мүрү 1-кы №-дээх уонна Мэҥэ Хаҥалас, Үөһээ Бүлүү улууһун Дүллүкү орто оскуолатын хамаандалара, оттон кыраларга (14-15 саастаахтарга) Мүрү 2-с №-дээх орто оскуолатын хамаандата кыттар чиэһи ылтара.
Эрхаан Мандаров, 9 кылаас үөрэнээччитэ, » Школьный дозор» этэрээт хамандыыра айан туһунан санаатын үллэһиннэ:
-2 сууккаттан ордук күһүҥҥү айылҕа бары кэрэтин Аллараа Бэстээхтэн Хабаровскайга диэри поезд түннүгүн нөҥүө астына көрө, үөрэ-көтө айаннаан кэллибит. Айаммыт суолун устун күрэхпитигэр бэлэмнэнэн, билиибитин хаҥатынныбыт, чиҥэттибит. Оонньоон да ыллыбыт, сайыҥҥы сонуннарбытын үллэһиннибит. Биһигини кытары биир күрэххэ баран иһэр ыаллыы богуоҥҥа баар Уус Алдан улууҺун оҕолорун кытары билсэн, ирэ-хоро кэпсэттибит. Дойдубут маҥан хаары кыыдамнатан, сири туртатан атаарбыт буоллаҕына, Хабаровскайга чугаһаан истэхпит аайы от-мас көҕөрөн, күн уота чаҕылыччы тыган, халлааммыт +27 °буолла. Тохтобулга түһэн, сибиэһэй салгыҥҥа сылдьа түһээри итииргээн ыллыбыт.
Тиийиэхтээх бириэмэбитигэр чопчу тиийбэтэбит, арыый хойутаатыбыт. 11 ч. диэки тимир суол вокзалыгар эрдэттэн заказтаабыт «Смарт отель» диэммитигэр киирэн, суунан-тараанан сыттыбыт. Үүнэр күҥҥэ биһигини Хабаровскай куораты кытары билсиһии күүпп8тэ.
Күрэскэ оҕолорбутугар күүстээх дьулууру, тулууру, ситиһиини баҕарыаҕыҥ!«Эрчим» медиакиин, Дүллүкү,Үөһээ Бүлүү