Олунньу 4 күнүгэр биһиги оскуолабытыгар буолан ааспыт Александр Иванович Федотов сырдык кэриэһигэр ыытыллыбыт V өрөспүүбүлүкэтээҕи куонкурус кыттыылаахтарын кытта кэпсэттим.
Александр Иванович Федотов оскуолабыт бочуоттаах мецената, «Республикатааҕы инвестиционнай компания (РИК)» бастакы генеральнай дириэктэрэ, Россия бочуоттаах тутааччыта, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Чурапчы улууһун, Чурапчы, Одьулуун, Хадаар нэһилиэктэрин бочуоттаах гражданина.
***
Амелия Гаврильева, IX “А” кылаас, V өрөспүүбүлүкэтээҕи куонкурус физика, математика олимпиадатыгар бастакы миэстэлээх, И.М. Яковлев аатынан Хаҥалас 1 №-дээх орто оскуолата, Хаҥалас:
– Хадаар нэһилиэгэр буолан ааспыт Александр Иванович Федотов сырдык кэриэһигэр анаммыт V өрөспүүбүлүкэтээҕи куонкурус олус үчүгэй өйдөбүлү хаалларда. Бэйэм математиканы ордоробун. Улааттахпына архитектор эбэтэр инженер буолар баҕа санаалаахпын.
***
Мила Чибаева, IX “А” кылаас, V өрөспүүбүлүкэтээҕи куонкурус физика, математика олимпиадатыгар үһүс миэстэлээх, И.М. Яковлев аатынан Хаҥалас 1 №-дээх орто оскуолата, Хаҥалас:
– Хадаарга ыытыллыбыт куонкурус олус үчүгэйдик ааста. Математика предметин сөбүлүүбүн. Инникитин быраас буолуохпун баҕарабын
***
Никита Иванов, IX кылаас, Е.П. Неймохов аатынан Мэҥэ Алдан орто оскуолата, Томпо:
– Александр Иванович Федотов сырдык кэриэһигэр анаммыт V өрөспүүбүлүкэтээҕи куонкурус ис хоһооно олус киэҥ. Манна олимпиада, хоһоон ааҕыыта, бырайыактары көмүскээһин – барыта баар. Киһини бары өттүнэн сайыннарарга сирдиир. Математиканы сөбүлүүбүн. Инникитин юридическай эбэтэр айти технология өттүнэн идэни баһылыахпын баҕарабын.
***
Станислав Касьянов, Х “А” кылаас, И.М. Яковлев аатынан Хаҥалас 1 №-дээх орто оскуолата, Хаҥалас:
– Хадаарга буола турар куонкурус олус үчүгэй дии саныыбын. Туһалаах. Физиканы уонна математиканы иккиэннэрин сөбүлүүбүн. Инникитин программист буолар баҕа санаалаахпын.
***
Игорь Захаров, XI кылаас, V өрөспүүбүлүкэтээҕи куонкурус физика, математика олимпиадатын үһүс миэстэлээх кыайыылааҕа, Е.П. Неймохов аатынан Мэҥэ Алдан орто оскуолата, Томпо:
– Хадаарга буола турар куонкурус олус интэриэһинэй. Киһи билиитин хаҥатарыгар туһалаах. Физика предметин сөбүлүүбүн. Б предмет инникитин программист идэтин баһылыырбар көмөлөһүө дии саныыбын.
Сайаана ФЕДОРОВА, V кылаас,
С.Д. Флегонтов аатынан Хадаар отро оскуолата, Чурапчы