Алтынньы 8-11 күннэригэр Дьокуускай куоракка «Сулус» үөрэтэр-ытар кииҥҥэ Аҕа дойду Улуу сэриитин снайпера, Сэбиэскэй Сойуус Дьоруойа Федор Матвеевич Охлопков аатынан Норуоттар икки ардыларынааҕы ыраахтан чопчу ытыыга турнир IV төгүлүн ыытылла турар. Быйылгы турнир маҥнайгытын Аан дойдутааҕы таһымы ылла.
Турнир историятыгар аан бастакытын 16-тан 18-гар диэри саастаах юниордарга туспа күрэхтэһии көрүҥэ тэрилиннэ. Уһук Илинтэн барыта 30 оҕо күөн көрүстэ, олортон 7 хамаандата — «ВОИН» киин филиалын иитиллээччилэрэ. Хас биирдии хамаанда 3 киһиттэн турар: кыыс уонна уол. Күрэххэ иккиэ буолан ыталлар — биирэ кэтээн көрөөччү, биирэ ытааччы оруолларын үллэстэн бастыҥ ытыы иһин кииристилэр.
Тэрийээччилэр хас биирдии хамаанданы сэбилээһининэн уонна тустаах тэриллэринэн хааччыйдылар: малоколибернай карабин, оптическай сыал, саа тэриллэрэ уонна ботуруоннар.
Улахан дьон күрэҕэ түүнүн эмиэ ыытыллар эбит буоллаҕына, юниорскай күрэх күн сырдык эрэ кэмигэр барар. Бастаан квалификация түһүмэҕэ, онтон 3 этабынан күрэхтэр ыытылыннылар. Сэрэбиэй түмүгүнэн пааралар маҥнай 100 м ытыыга квалификация аастылар. Онтон этап күрэхтэрэ 125-350 м ытыыга 2-3 эрэ төгүл 360 сөкүүндэ иһигэр ытан күрэхтэстилэр.
Кыайыылаахтары хамаанданан уонна пааранан диэн арааран дьүүллүөхтэрэ.
Федор Матвеевич Охлопков — снайпер
1941 сыл ахсынньы 12 күнүгэр бырааттыы Охлопковтар Калинин (билигин – Тверь) анныгар бастакы кыргыһыыларыгар киирбиттэрэ. Федор пулемет расчетун бастакы ытааччыта, оттон Василий – иккис ытааччыта буолбуттара. 1942 сыл алтынньытыттан Федор Охлопков 43-с аармыйа 179-с дивизиятын 234-с полкатыгар сэриилэспитэ. Бастакы нэдиэлэҕэ кини 11 фашиһы суох оҥорбута, сотору Матвеево сэлиэнньэтин иһин кыргыһыыга өссө 27 өстөөҕү охторбута. 1944 сыл сайыныгар Федор Охлопков фашист 429 саллаатын уонна эпиһиэрин суох оҥорбута (пулеметунан сэриилэһэр кэмин аахпакка). 179-с дивизия 1-кы Прибалтийскай фронт састаабыгар киирэн, Белоруссияны босхолуурга бэлэмнэнэрэ.
Снайпер идэтэ тугу эрэйэрий?
«Снайпер идэтэ олус кутталлаах, тоҕо диэтэххэ кини хаһан баҕарар инники күөҥҥэ сылдьар. Позиционнай сэрии кэмигэр да, снайпердартан аҕыйахтара эрэ ордоро, тоҕо диэтэххэ ыппыт сирдэрин фашистар артиллерия-миномет уотунан саба уһуураллара. Бу хааннаах кыргыһыыттан ордоллоро олус уустук этэ», — диэн байыаннай историк Юрий Ржевцев этэн турар.
Маннык хабааннаах күрэхтэр патриотическай иитиигэ уонна көлүөнэлэр сибээстэригэр улахан суолталаахтар. Билиҥҥи кэмҥэ дойдуга буола турар дьайыылартан сибээстээн ытыы көрүҥэ эдэр ыччакка, оҕолорго өссө күүстээх интэриэһи тардарын бэлиэтиибит. Снайпер идэтин баһылыырга киһи дьулуурдаах, тулуурдаах, күүстээх санаалаах, чопчу сыаллаах-соруктаах, ардыгар тоҥ сүрэхтээх, дойдутугар бэриниилээх буолуохтаах диэн турнир эдэр көлүөнэтэ, юниордар, бэйэлэрин санааларын эттилэр. Бу күрэххэ кэлбит хас биирдии кыттааччы баҕалаах уонна туох иһин күрэхтэһэ сылдьарын чопчу өйдүүр. Онон кинилэргэ ситиһиини уонна инникитин даҕаны үрдүк дабайыылары баҕарабыт!
Сиһилии видео-матырыйаалга көрүҥ:
Кэскил14.ру