Э.К. Пекарскай аатынан Игидэй орто оскуолата РФ министерствотын өйөөһүнүнэн “Знание” төрөппүттэр сообществоларын уопсастыбата көҕүлээһининэн тэрийбит гранын кыайыылааҕынан тахсан, 900-н тахса тыһыынчанан үбүлэннэ.
Граны көмүскүүргэ күүстээх хамаанда үлэлээтэ. Ол курдук, оскуола дириэктэрэ: А.А. Миронов, соц.педагог А.В. Бойтунова, психолог А.К. Захарова, иитэр үлэ саабыһа Л.Н. Захарова, төрөппүт кэмитиэтиттэн, бэрэсэдээтэл М.С. Лебедева, М.Г. Егорова күрэскэ барыта 7000-н тахса сайаапка киирбититтэн, 4395 бырайыак күрэстэспититтэн, 397 сайаапка өйөбүлү ылла. Игидэй орто оскуолата «Уйулҕа» кабинетын тэрийии бырайыагынан кыттан кыайыылаах үрдүк аатын сүктэ.
Алтынньы 26 күнүгэр тупсаҕай оҥоһуулаах, саҥа аныгылыы оборудованиенан “Уйулҕа” хоһун арыйыы үөрүүлээх түгэнэ тосхойдо. Игидэй орто оскуолатын үөрэнээччилэрэ, коллектива, ыҥырыылаах ыалдьыттар өрө көтөҕүллэн туран, бука бары биир тыынынан тэрээһин тэтимигэр киирдилэр. Күндү ыалдьыттарынан буоллулар: Улуустааҕы үөрэҕирии салаатыттан И.И. Дягилев, Т.А. Тютрина. Тыа сирин көҕүлүүр дирекциятыттан Г.Г. Вырдылин, В.И. Колодезникова санааларын үллэһиннилэр, бэйэлэрин эҕэрдэлэрин тиэртилэр.
Тэрээһин үөрүүлээх чааһын иилээн-саҕалаан ыыттылар Н.Б. Баннова — дириэктэр сүбэһитэ, М.П. Ермолаева — нуучча тылын уонна лэтэрэтиирэтин учуутала.
Бу курдук өрөгөйдөөх күн Игидэй орто оскуолатыгар тосхойдо. Саҥа арыллыбыт «Уйулҕабыт» хоһо уһун үйэлээх буоллун, элбэх оҕоҕо, төрөппүккэ сырдыгы сыдьаайар, санааны бөҕөргөтөр таһаарыылаах үлэни ыыттын,. Бу хостон көмө-тирэх ылан сырдык ыраас олох сыдьаайдын.
Варвара Ефимова, Дэбдиргэ, Таатта