Аркадий Аркадьевич Пудов – 1975 сыллааҕы артековец. Кини билигин анал байыаннай дьайыылар ветерана, история уонна обществознание учуутала, Донбасс баҕа өттүнэн сойуустарын региональнай салаатын бэрэссэдээтэлэ.
Аркадий Аркадьевич “Артек” лааҕырга 1975 сыллаахха Хаҥалас улууһун 2-с Малдьаҕар оскуолатыттан талыллан барбыт.
– “Артек”, кырдьык, биһиги дойдубутун сомоҕолуур, бары норуоттарын биир тыыҥҥа, биир патриотическай идеяҕа түмэр, биһиги бары бииргэбит диэн өйдөбүлү үөскэтэр лааҕырбыт этэ. 1975 сыллаахха Саха сириттэн 20 оҕо буолан барбыппыт. Бастаан тиийэн баран кырабыт-харабыт, соччо-бачча биллибэппит-көстүбэппит. Онтон күрэхтэһиилэр буолан киирэн бардылар. Сүүрүүгэ, пулевой ытыыга сахалар бастакы сылдьабыт. Аны авиамодельнай куруһуокка сылдьан астыныы бөҕөтөбүн, – диэн кэпсиир артековец А.А. Пудов.
Кини манна Крымскай, Аҕа дойду Улуу сэриитин кэпсиир туһунан музейдарга сылдьан баран, кырдьык, улахан да сэриилэр буолан ааспыттар эбит диэн историяны олус дириҥник ылыммыт.
– Онтон да сиэттэрэн буолуо, история учуутала буолбутум. Билигин да учууталлыы сылдьабын. Наһаа элбэх ырыаны үөрэтэллэр этэ. Ырыата суох ханна да хаампаккын – сөтүөлүү, аһыы бараргар, экскурсияҕа бараргар – барытыгар ырыа. “Хрустальная” диэн наһаа ыраас, киһиэхэ өйдөнүмтүө баҕайы тыллардаах ырыаны билиҥҥээҥҥэ диэри өйдүүбүн:
“Все сбываются мечтания,
И в Артеке ты, да я.
Подружила нас «Хрустальная» –
Пионерская семья!”
Саамай ыарахан арахсар күммүт этэ. Аны 10-15 сылынан Москваҕа көрсүөхпүт диэн буолбута. Көрсүбүттэрин көрсүбэтэхтэрин билбэппин, бэйэм кыайан барбатаҕым. Ол гынан баран “Артекка” сылдьыбыт кэмим олоҕум саамай үтүө кэмнэрэ, бииргэ сылдьыбыт оҕолорбун умнубаппын, – диэн Аркадий Аркадьевич наһаа истиҥник кэпсээтэ.
Элеонора ПЕТРОВА, VIII “Г” кылаас,
17 №-дээх оскуола, Дьокуускай