Амма улууһун Бөтүҥ орто оскуолатын IX кылааһын үөрэнээччитэ, «Эрэл» түмсүү президенэ Айдын Иванов сайыҥҥы сынньалаҥын туһалаахтык саҕалаата. Ол курдук, ыам ыйын 30 күнүттэн бэс ыйын 13 күнүгэр диэри «Бэс чагда» Кииҥҥэ сынньанан, астынан, элбэх саҥаҕа үөрэнэн кэллэ.
Н.Е. Иванов аатынан Бөтүҥ орто агро оскуолатыгар путевканы лидер оҕолорго иккис сылын бастаан өрөспүүбүлүкэтээҕи, онтон улуустааҕы күрэхтэри тэрийэрбит иһин Амма улууһун үөрэҕин салалтата анаабыта. Мин Айдынтан аҕыйах ыйытыыга хоруйдууругар көрдөстүм.
«Биһиги симиэнэбит аата «Привет, Артек!» диэн этэ. Мин үһүс этэрээккэ баарым. Барыта 4 этэрээт баара. Бастаан 27 этибит, онтон эбии оҕолор кэлэннэр, 30 буолбуппут. Мин ордук кислороднай коктейли сөбүлээтим. Бары ыытыллар тэрээһиннэри сэргээтим. Лааҕырга оҕолору олоххо көхтөөх буоларга бэлэмнииллэр эбит. Ону таһынан уруһуй, үҥкүү уонна видео уһулан, монтажтыырга үөрэттилэр. Баһаатайдарбыт Камила Алексеевна, Амир Русланович диэннэр. Олус сэргэх баһаатайдардаахпытынан олус астыммытым. Бэйэбэр саҥа билиини ыллым, үгүс оҕону кытта билистим. Уопсайынан, маннык лааҕыр олус туһалаах, киһи бэйэтин көрүнэ үөрэнэр. Сэрээккэлээн, битэмииннээх аһы аһаан, дуоһуйа астынан кэллим», — диэтэ Айдын Иванов.
Максим Неустроев,
«Платформа» медиа киин чилиэнэ,
Бөтүҥ Амма.
keskil14.ru