Билигин бензин баара-суоҕа төһө сытыытык турар кыһалҕаный? Ол туһунан билээри биһиги Хаҥалас улууһун Улахан Аан нэһилиэгэр баар “Туймаада-нефть” заправка операторын Ефремов Григорий Ильиһы кытта кэпсэттибит.
Дорооболорун. Билигин Улахан Ааҥҥа бензин төһө баарый?
Дорооболорун. Холобура, 95-тээх 13 тонна баар, 92-лээх 29 тонна баар. 92-лээх лимит буолан турар, ол эбэтэр бобуллан турар. Сотору көҥүллүөхтэрэ. Сэлээркэ 20 тонна баар.
Суоппардарга төһө бензини кутаҕытый?
Биир суоппарга, ол эбэтэр биир массыынаҕа 20 лиитэрэ бензини кутабыт.
Сыаната төһө буоларый?
АИ-95 лиитэрэтэ 105.50 солкуобай, АИ-92 1 лиитэрэтэ150 солкуобай, дизтопливо 1 лиитэрэтэ 126.50 солкуобай.
Эһиги санааҕытыгар бензин төһө кыһалҕа буолланый?
Бензин аҕыйаабыта дьоҥҥо кыһалҕаны үөскэттэ. Онно-манна бараары-кэлээри гыннахтарына, бензин суох буоллаҕына, сатаан барымыахтарын сөп. Онон, холобура, бэйэлэригэр хаһаастаах курдук буолуохтарын наада дии саныыбын.
Оттон сайын отчуттарга бензин суоҕа эмиэ кыһалҕаны үөскэппитэ буолуо дии?
Улуустар туруорсаннар, бэйэлэрэ лимит олохтообуттара: ким төһө сүөһүлээҕинэн, сылгылааҕынан диэн.
Онтон билигин сайыҥҥытааҕар балаһыанньа уларыйда дуо?
Билигин балаһыанньа холкутуйда. Ордук балаҕан ыйыгар манна уочарат кытаанаҕа этэ. Киһи барыта бензиҥҥэ уочараттаабыта.
Билигин, холобура, бензин ыйга хаста кэлэрий: биирдэ дуу, иккитэ дуу?
Бензин бүттэ да – аҕалаллар.
Кэпсээбиккит иһин махтал.
Альмира Кириллина, Алина Платонова М.Е.Васильева аатынан 2 Малдьаҕар орто оскуолатын 8 кылааһын үөрэнээччилэрэ, “УОТ” медиакиин