Семен Дмитриевич Флегонтов аатынан Хадаар орто оскуолата быйылгы үөрэх дьылын үөрүүлээх сонуннаах түмүктээн эрэбит. Ол курдук «Сэрии тыыннаах куоластара» диэн бырайыакпыт култуурунай көҕүлээһиннэргэ Арассыыйа Президенын фондатын Гранын ылла.
Бырайыак ааптара оскуолабыт медиа киинин салайааччыта Лидия Ивановна Лукина, онтон салайааччыта оскуолабыт дириэктэрэ Петр Петрович Тарасов буоллаллар.
Бу бырайыак сүрүн ис хоһооно – сэбиэскэй норуот 1941-1945 сс. Аҕа дойду Улуу сэриитигэр ситиспит Улуу Кыайыытын үйэтитии, аныгы кэм дьонугар дириҥник, кырдьыктаахтык тиэрдии, төрөөбүт нэһилиэкпит Хадаар Кыайыыга кыттыспыт кылаатын, сэрии ыар тыынын билбит ытык көлүөнэ дьонун үйэтитии буолар.
Нэһилиэкпитигэр Чурапчы оройуонун хоту көһөрүллүүтүн үс кыттыылааҕа – Марфа Васильевна Никитина, Дмитрий Константинович Лукин, Александра Васильевна Софронова, сэрии сылын оҕото Ксения Семеновна Игнатьева олороллор.
Бу ылбыт Гранмыт түмүгүнэн «Сэрии тыыннаах куоластара» диэн документальнай киинэни устан таһаарыахтаахпыт. 2022 сылтан «Кэскил» медиа оскуолаҕа дьарыктаммыт, элбэххэ үөрэммиппит Арассыыйа Президенын Гранын ыларбытыгар көмөлөстө. Түгэнинэн туһанан Н.Е. Мординов-Амма Аччыгыйа аатынан «Кэскил» оҕо бэчээтин кыһатыгар махтанабыт.
Мантан сайын биһигини хамаанданан күүстээх, интэриэһинэй үлэ күүтэр.
Алена КСЕНОФОНТОВА, VIII кылаас,
С.Д. Флегонтов аатынан Хадаар орто оскуолата, Чурапчы