«Ааҕыы — бу өй үлэтин муҥутуур чыпчаала». (Платон Ойуунускай)
Бүгүн, алтынньы 28 күнүгэр, оскуола бибилэтиэкэлэрин аан дойдутааҕы күнүн бэлиэтиибит.
Оскуола бибилэтиэкэтэ диэн — оскуола сүрэҕэ, үүнэр көлүөнэҕэ билиини-көрүүнү, үтүөҕэ-кэрэҕэ тардыһыыны иҥэрэр сир. Оттон кинигэ диэн өй-санаа баайа, көлүөнэлэр ситимнэрэ буолар. Хас биирдии үөрэнээччи оскуола бибилэтиэкэтиттэн бэйэтигэр сөптөөх кинигэни булар, онон кини өйүн-санаатын сайыннарар, ааҕар дьоҕура күүһүрэр.
Аныгы кэм оскуолатын бибилэтиэкэтин билиҥҥи кэм порталын аана диэтэхпитинэ сыыспаппыт, билигин араас хабааннаах кинигэлэр, сурунааллар, үлэлиир тэтэрээттэр, комикстар о.д.а тахсаллар. Биһиги ханна баҕарар айанныахпытын сөп: былыргы Египет пирамидаларыттан ыраах сулустарга тиийэ.
Бибилэтиэкэр идэтэ атын идэттэн олус ураты, манна киһи бэйэтэ ананан кэлэр. Кини хас биирдии кинигэни, хас биирдии дьоруойу, хас биирдии күнү-дьылы өйүгэр тута сылдьар сүдү киһи. Кини эн санааҕын таба таайан, эйиэхэ наадалаах кинигэни илиигэр туттарар кыахтаах. Кини көмөтүнэн эн аан бастаан Олоҥхо бухатыырдарын кытта охсуһар, Жюль Верн фантазияларыгар куотар уонна Пушкин хоһоонноругар дууһаҕын арыйар буолаҕын.
Онон оскуола бибилэтиэкэтэ — бу биһиги иккис дьиэбит кэриэтэ. Манна уруок кэнниттэн сынньанабыт, доҕотторбутун кытта кэпсэтэбит, дакылааттарбытын бэлэмниибит. Күндү бибилэтиэкэрдэрбит, эһиги сыралаах үлэҕит иһин барҕа махтал! Эһиэхэ саҥа санаалары, сырдык идиэйэлэри уонна бэриниилээх ааҕааччылары баҕарабыт!
Оскуолалар бибилэтиэкэлэрин долбуурдара хаһан даҕаны кураанах турбатын, оттон кинигэлэр саҥаттан саҥа билиини бэлэхтээтиннэр!
Кэскил14.ру