СӨ Үүнэр көлүөнэ тыйаатыра диэтэхтэринэ, тута саха киинэлэрин саныы биэрэҕин. Холобур, соторутааҕыта “Диодорова: Против течения”, “Алдан” киинэлэр дойду үрдүнэн прокатка тахсан, көрөөччү сэҥээриитин ыллылар. Сүрүн оруоллары Үүнэр көлүөнэ тыйаатырын артыыстара Федот Львов (аҕа оруолугар), Илья Яковлев (сүрүн герой Алдан), Владимир Охлопков (байыас) итэҕэтиилээхтик оонньууллар. Тыйаатыр артыыстара ити курдук, үгүстүк киинэлэргэ, сериалларга табыллан оонньууллар. Айымньылаах үлэ сылы супту сириэдийэр!
Бу күннэргэ айар кэлэктиип “Кыһыл көмүс мааска” тыйаатыр Бүтүн Росситятааҕы фестивалыгар дойдубут тэбэр сүрэҕэр Москваҕа “Мин баар буолуохтаах хаартыскам” диэн Виктор Астафьев айымньытынан испэктээкили көрдөрөн кэллэ. Кыһын Үүнэр көлүөнэ тыйаатыра “Кыһыл көмүс мааска” фестивальга “Лучший спектакль. Драматический театр. Малая форма” категорияҕа сүүмэрдэнэн киирбитэ биллибитэ. Испэктээкили экспертиир сэбиэт чилиэнэ И.Р. Альмухаметов Дьокуускайга кэлэн көрбүтэ. Россия араас муннугуттан барыта 734 сайаапка баарыттан шорт-лист кэккэтигэр киирии үрдүк ситиһии! Үүнэр көлүөнэ тыйаатырын сэргэ, Саха сириттэн Д.К.Сивцев-Суорун Омоллоон аатынан Опера уонна балет тыйаатыра “Сияющий камень” туруоруутунан фестиваль 7 номинациятыгар кытта сылдьар. Ити бэлиэ түгэҥҥэ анаммыт пресс-кэмпириэнсийэҕэ СӨ култууратын миниистирин солбуйааччы Мария Турантаева маннык дьоһун түгэнинэн айар кэлэктииби эҕэрдэлээтэ, маннык сырдык тыыннаах туруоруулар чахчы да кынаттыыларын, умсугуталларын, кэрэҕэ угуйалларын бэлиэтээн эттэ.
Тыйаатыр уус-уран салайааччыта, РФ култууратын үтүөлээх үлэһитэ, СӨ норуодунай артыыһа, Федор Волков аатынан РФ Бырабыыталыстыбатын бириэмийэтин лауреата, “За заслуги в культуре и искусстве” уордьан кавалера Алексей Павлов 2009 с. тыйаатыр “Кыһыл көмүс мааска” фестивальга “Эксперимент” хайысхаҕа “Аһыныгас санаалаах Айыы Дьураҕастай” испэктээкилинэн кыттыа сылдьыбытын, онон 16 сыл буолан тыйаатыр эйгэтин улахан фестивалыгар кыттыбыттарын санатта.
Испэктээкили 2024 с. режиссер Антон Ботаков туруорбут. Былырыын суруйааччы Виктор Астафьев төрөөбүтэ 100 сыла этэ. Аны, айымньы 1964 с. суруллубут буолан, 60 сыл буолан баран, сахалыы саҥардаҕа! Испэктээкил ааспыт үйэ 90-с сылларын көрдөрөр. Куораттан географ олохтоох сири-уоту, бэлиэ миэстэлэри, итиэннэ олохтоохтору устар үһү диэн сурах дьоҕус дэриэбинэни тилийэ көтөр. Эдэр да, эмэн да кэнэн, оҕолуу аһаҕас, өс киирбэх майгылаах хотугу дьон ити түгэни хайдах ылынара бу испэктээкили көрбүтү эрэ барыларын долгутар, манньытар, уйадытар, таарыйар. Ол курдук, сырдык, сылаас бэйэлээх эбээ Екатерина Петровна оруолун СӨ үтүөлээх артыыската Мария Данилова, дьиҥ кытайдыы суккуйан кэпсэтэр географ Ли Ган, оператор Ван Ли оруолларын Ньургун Черов, Мичил Хомподоев, эбэтэр, оҕо буолбут Сергей Эверстов, Спартак Ларионов, атын бары да артыыстар сүрдээх итэҕэтиилээхтик оонньоон көрдөрөллөр. Кытайдыы ыраас саҥаны-иҥэни тыйаатыр эппиэттээх үлэһитэ, СӨ култууратын туйгуна Мария Андреева чочуйбут.
— Ханна эмэ ыраах көтөр буоллахпына, айан кэмигэр сатаан утуйбаппын. Ол оннугар ааҕарбын сөбүлүүбүн. Бу айымньыны Дьокуускай-Москва хайысханан көтөр аалга олорон, ааҕан баран, сэҥээрбитим. Бэйэм тыа сирин олоҕун көрдөрөр, олус күүркэтиитэ, киэргэтиитэ суох айымньылары ордоробун. Тыйаатыр диэн — сыччах биир киһи буолбакка, бүтүн кэлэктиип үлэтэ. Сүрүн диалогтары айымньыга баарын курдук, оннунан хаалларбыппыт, — диир туруорааччы-режиссер Антон Ботаков.
“Кыһыл көмүс мааска” түмүгэ сайын, бэс ыйын бүтүүтэ биллиэҕэ.
Жанна Леонтьева.
keskil14.ru