Чурапчы улууһуттан Ил Дархан Харыйатыгар быйыл 26 оҕо кыттыыны ылар. https://vk.com/wall-199463452_16802
Ахсынньы 19 күнүгэр кинилэр Чурапчы гимназиятыгар түмсэн аастылар, «Биһиги – Арассыыйа кэскиллэрэбит!» гражданскай форумҥа бэлэмниир воркшопка кыттыыны ыллылар.
Бу тэрээһин улууспут историятыгар, сайдыытыгар суолталаах дьон көҕулээбит үлэлэрин-хамнастарын салгыыр сыаллаах.
Холобур, эһиилги сылга биһиги киэҥ туттар биир дойдулаахпыт Федерация Сэбиэтин аграрнай-продовольственнай политикаҕа уонна айылҕаны туһаныыга комитетын бэрэссэдээтэлин солбуйааччы Егор Афанасьевич Борисов 70 сааһын туолар. Кини төрүт сиргэ-уокка сыһыана Чурапчыттан төрүттээхтэрэ барыларыгар холобур буолар. Ийэ дойдуга таптал философиятын арыйар бырайыактарбытын кини этиилэригэр, дьаһалларыгар олоҕуран оҥоро сатаатыбыт. Эбэлэрбит, эһэлэрбит, ийэлэрбит, аҕаларбыт таптаан, харыстаан кэлбит сирдэрин-уоттарын сайыннарыыга санааларбытын түмтүбүт.
Быйыл XVI төгүлүн ыытыллар өрөспүүбүлүкэтээҕи «Биһиги – Арассыыйа кэскиллэрэбит!» гражданскай форумҥа Дьокуускай куоракка Ил Дархан Харыйатын чэрчитинэн, ахсынньы 23 күнүгэр буолуоҕа.
Чурапчы улууһун хамаандата бу улахан трээһиҥҥэ ханнык бырайыагы хайдах көмүскүөхтээҕин туһунан кэпсэттилэр, биэс хамаандаҕа арахсан бырайыак толкуйдаан таһаардылар.
Олеся Орлова, XI кылаас, С.Д. Флегонтов аатынан Хадаар орто оскуолата:
– Бүгүн биһиги гимназияҕа быйылгы Ил Дархан Харыйатыгар барар Чурапчы улууһун оҕолоро кэллибит. Хамаандаларынан арахсан, дьиэ кэргэн тиэмэтигэр сыһыаннаах бырайыактары оҥордубут. Биһиэхэ «Кэскил» оҕо бэчээтин кыһатын үлэһиттэрэ кэлэн көмөлөстүлэр. Сүбэ-ама биэрдилэр, бэйэлэрин билиилэриттэн-көрүүлэриттэн бэристилэр. Биһигиттэн 10 оҕо талыллан ахсынньы 23 күнүгэр буолар Форумҥа улууспут чиэһин көмүскүөхтэрэ. Мин кинилэргэ ис сүрэхпиттэн ситиһиилэри уонна кыайыыны баҕарабын. Тус бэйэм бу воркшопка кыттаммыт бэйэбэр элбэҕи арыйдым дии саныыбын.
Айта Данилова, XI кылаас Мугудай орто оскуолата:
– Бүгүҥҥү тэрээһини сөбүлээтим. Киһи киһи буолан тахсарыгар дьиэ кэргэн улахан оруоллаах. Ону оҕолорго быһааран, кэпсээн, тэрээһиннэри ыытан өйдөтөрбүт мин санаабар, туһалаах. Оҕо биир саастылааҕар быһааран, кэпсээн биэрэрин ордук чугастык ылынар дии саныыбын. Ол иһин оҕолор санааларын этэллэригэр сөптөөх Форумнар ыытыллаллара туһалаах.
Сардаана Матвеева, «Кэскил» хаһыат, «Бэлэм буол» сурунаал кылаабынай эрэдээктэрэ:
– Бүгүн биһиги С.К. Макаров аатынан Чурапчы гимназиятыгар үлэлии сылдьабыт. Сүрүн сыалбыт – ахсынньы 23 күнүгэр буолар XVI Өрөспүүбүлүкэтээҕи «Биһиги – Арассыыйа кэскиллэрэбит!» гражданскай форумҥа оҕолору бэлэмнээһин. Ханнык, туох сыаллаах-соруктаах бырайыагы көмүскүөхтээхтэрин туһунан сүбэ-соргу биэрэн, ыйан-кэрдэн оҕолорбутун кытта бииргэ үлэлээтибит. Манна сыһыаран этэр буоллаха, Чурапчы улууһун 10 оскуолатыгар «Кэскил» оҕо бэчээтин кыһата медиа-оскуолалары иилээн-саҕалаан үлэлэтэр. Чурапчы улууһуттан Ил Дархан Харыйатыгар кыттар оҕолор кэккэлэригэр биһиги юнкордарбыт баалларыттан үөрдүбүт, астынныбыт.
Виктория Колодезникова, «Кэскил» хаһыат, «Бэлэм буол» сурунаал эрэдээктэрэ:
– Бүгүҥҥү үлэбит таһаарыылаах буолла диэн сыаналыыбын. Оҕолор оҥорон таһаарбыт бырайыактарын ис хоһоонун арыйан көмүскээтилэр. Форумҥа кыттар хамаанда баар буолла. Сыал-сорук чопчу туруорулунна. Салгыы оҕолорубутун кытта көмүскүөхтээх бырайыактарыгар өссө үлэлиэхпит. Онон үлэбит манан түмүктэммэт, салҕанар.
Воркшопка түмүгүнэн 26 оҕоттон 10 оҕо талыллан Форумҥа кыттар чиэскэ тигистилэр. Онтон биһиги гимназиябытыттан, бэйэлэрин көхтөөхтүк көрдөрөн, Уйгу Гуляева (XI «А» кылаас), Сандаара Керемясова (XI «А» кылаас), Алексей Абрамов, (XI «Б » кылаас) уонна Андрей Степанов (Х «Б» кылаас), Фомуҥа кыттар хамаанда састаабыгар киирдилэр. Доҕотторбутугар ситиһиини баҕарабыт!
Маша СИБИРЯКОВА, IX «Б» кылаас,
«Тумус кыһа» пресс-киин,
С.К. Макаров аатынан Чурапчы гимназията