С.Д. Флегонтов аатынан Хадаар орто оскуолатыгар спорду өрө тутабыт. Тоҕо диэтэххэ, спорт киһи өйө-санаата сырдык, этэ-сиинэ чэбдик буоларыгар көмөлөөх.
Биир күрэхтэһиигэ икки чемпион!
Быйылгы үөрэх дьылыгар биһиги оскуолабыт мадьыныларын биир улахан кыайыыларын Амма улууһун Мээндиги нэһилиэгэр ыытыллыбыт өрөспүүбүлүкэтээҕи түһүлгэтигэр ситиспиттэрэ.
Бу улахан күрэхтэһии Владимир Никитин сырдык кэриэһигэр сылын аайы оҕолорго анаан ыытыллар. Быйылгы түһүлгэҕэ алта улуустан 116 эдэр мадьыны кэлэн, 20 ыйааһыҥҥа күрэхтэспиттэр.
С.Д. Флегонтов аатынан Хадаар орто оскуолатыттан 3 оҕо кыттыбыта. Кинилэртэн Петя Герасимов (VII кылаас) 40 киилэҕэ, Вова Герасимов (IX кылаас) 55 киилэҕэ чемпион аатын ылбыттара.
Уолаттар тренердэрэ Леонид Николаевич ирдэбиллээх, үрдүк сыалы-соругу туруорар, оҕолор спортка тардыһыларын көҕүлүүр. Мас тардыһыыга элбэх чемпионы иитэн таһаарда. Уолаттарбыт күрэхтэһиилэриттэн куруук мэтээллээх төннөллөр. Ол да иһин күрэхтэһэ барбыттарын иһиттэхпитинэ, уолаттарбыт хайаан да мэтээллээх кэлиэхтэрэ диэн күүтэбит, кинилэргэ эрэнэбит.
Иванна НИКОЛАЕВА, VIII кылаас, Хадаар, Чурапчы
“Ийэм, аҕам уонна мин”
Оҕо спортка сыстара дьиэ кэргэниттэн саҕаланар. Ол иһин оскуолабытыгар “Ийэм, аҕам уонна мин” диэн дьиэ кэргэн спортивнай күрэхтэһиитэ ыытыллар.
Соторутааҕыта буолан ааспыт күрэххэ I-V кылаас оҕолоро төрөппүттэрин кытта алта түһүмэҕинэн күрэхтэстилэр. Манна физическэй эрэ өттүнэн буолбакка, өйү, билиини бэрэбиэркэлиир ыйытыыларга эмиэ эппиэттээтилэр. Кылаас оҕолоро кыттааччыларга “ыалдьан” күүс-көмө буоллулар. Онон олус сэргэх, бэһиэлэй күн ааспыта. Маннык тэрээһин буолара наһаа үчүгэй. Бары биир санааҕа түмсэбит.
Күрэх түмүгүнэн IV кылаас үөрэнээччитэ Амелия Мордускина дьиэ кэргэнин хамаандата бастакы, II кылаас үөрэнээччитэ Элла Тарасова дьиэ кэргэнин хамаандата иккис, III кылаас үөрэнээччитэ Антон Решетников дьиэ кэргэнин хамаандата үһүс миэстэ буоллулар.
Милена БАНДЕРОВА, V кылаас, Хадаар, Чурапчы