Бэс ыйын 8 күнүгэр бадминтон күрэҕин иккис күнэ үрдүк таһымнаахтык ааһан эрэр. Билэрбит курдук, бадминтон спартакиадаҕа көрүҥ быһыытынан быйыл саҥа киирдэ. Ол иннинэ суоҕа. Маннык спорт көрүҥнэрин өрө тутар, сайыннара сатыыр дьон арааһа аҕыйахтара буолуо. Бүгүн биһиги Дьокуускай куорат 7 №-дээх оскуолатын физкультураҕа учуутала, бадминтон көрүҥүн олоххо киллэрээһиҥҥэ үлэлэспит Илья Николаевич Алексеевтыын кэпсэтиэхпит.
– Үтүө күнүнэн! Бандминтон хайысханан хаһааҥҥыттан дьарыктанаҕытый?
– Мин устудьуону сылдьан оонньуур этим. Кэлин саамай улахан судьуйабыт, доҕорум Александр Анатольевич Афанасьевтыын оонньооччубут. Бадминтон көрүҥү олус сөбүлүүбүт.
– Эһигитини лааҕыр арыйан үлэлэтэ сылдьар диэн кэпсээбиттэрэ. Сырдатыаҥ дуо?
– Лааҕырбыт үһүс сайына. Дьокуускай куорат 35 №-дээх оскуолатын иһинэн үлэлиир. Дьиҥэ волейбол хайысхалаах. Уонна ГТО тутабыт, бэлэмниибит. Лааҕыр бүтэһик күнүгэр ГТО бэлиэлээх бүтэрэллэр.
– Лааҕырга уопсайа хас оҕону дьарыктыыгытый?
– Уопсайа биир сезоҥҥа 25 оҕо дьарыктанар. Бары 2013 сыллаах оҕолор, ол эрэн, биир 2 кылааһы бүтэрбит оҕо баар. Салгыы бу оҕолор спорт хайысхалаах оскуолаҕа киирэллэрин ситиһиэхтээхпит.
– Лааҕырга дьарыктанар оҕолортон бүгүн бадминтон көрүҥҥэ күрэхтэһэ сылдьаллар дуо?
– Биһиги оскуолабытыттан икки оҕо оонньуу сылдьар. Диана Филиппова уонна Богдан Бережнев. Бережнев остуол оонньуутугар спортка маастар. Хабылык уонна хаамыска көрүҥэр.
– Бадминтон күрэҕэ хайдах ааһан эрэр дии саныыгытый?
– Тыҥааһыннаахтык, күүстээхтик ааһан эрэр дии саныыбын. Күүстээх да оҕолор бааллар эбит! Кытай устудьуоннара кытта кэлбит оҕолорго, тренердарга мастер-класс көрдөрөн күрэҕи өссө киэргэттилэр. Мин санаабар биһиги өрөспүүбүлүкэбитигэр бу көрүҥ сайдыа дии саныыбын. Бу буола турар бандминтон күрэҕэ быйыл бэлэмнэнии көрүҥ курдук киирдэ. Ол эрэн, эһиил олохтоохтук күрэх быһыытынан киирэрэ буолуо.
– Оҕолорго 5 ханнык сүбэни этиэҥ этэй?
– Бадминтоҥҥа мин маннык толкуйдаан көрдөхпүнэ, волейбол, теннис көрүҥнэрэ арыый чугас курдуктар. Ынырык хамсаныылаах ооонньуу. Оскуолаларынан сайдан барара буоллар. Уруок бириэмэтигэр оҕолор сүрдэҕин интэриэһиргиэ, дьарыктаныа этилэр. Тулуурдаах, ылыммыт сыалын ситиһэр, түргэнник толкуйдуур,дьаныардаах оҕо арааһа бу көрүҥү баһылыыра буолуо.
– Эппиэккит иһин махтал!
Юнкор — Нарыйа Нестерова, “Кэскил” юнкора, Дүпсүн, Уус Алдан.
Хаартыскаҕа түһэрдэ – Айсилена Соловьева, “Кэскил” юнкора, Дүпсэ, Уус Алдан.