Чурапчы улууһун олоҕор Өрөспүүбүлүкэ күнүн көрсө саҥа сүүрээн киирдэ. Ол курдук Аллараа Бэстээхтэн Чурапчыга диэри автобус сылдьар буолуоҕа.
Бастакы рейс муус устар 26 күнүгэр оҥоһуллара былааннанар. Былаан быһыытынан, бастакы рейс Чурапчыттан Аллараа Бэстээххэ сарсыарда 7 чааска айанныаҕа. Иккис рейс Аллараа Бэстээхтэн Чурапчыга киэһэ 6 чааска турунуоҕа. Онтон үһүс рейс Чурапчыттан Аллараа Бэстээххэ киэһэ 9 чааска айанныаҕа. Автобус пассажира 412 солк. төлүөҕэ.
Мин сонун сүүрээн туһунан Чурапчы олохтоохторуттан санааларын ыйыталастым.
Саргылаана Васильевна Стручкова,
«Алмазкредитсервиз» үлэһитэ:
– Билигин туох да диир кыаҕым суох. Үлэлээн саҕалаатаҕына, автобус сырыттаҕына, түмүк санааны оҥостуом дии саныыбын. Маннык айан маршрута оҥоһуллубута үчүгэй бөҕө буоллаҕа дии.
Вероника Михайловна Абрамова,
С.К. Макаров аатынан Чурапчы гимназиятын социальнай педагога:
— Автобустар Чурапчыттан Аллараа Бэстээххэ диэри сылдьар буолаллара олус үчүгэй дии саныыбын. Тоҕо диэтэххэ, бастакынан, сыаната чэпчэки, иккиһинэн, нэһилиэктэргэ тохтобуллар бааллар. Ордук устудьуоннарга, ыччакка туһалаах буолуо диэн эрэнэбин. Саамай баҕарарым диэн биир икки сырыынан тохтоон хаалбакка, олохтоохтор өйөбүллэринэн сайдан иһэрэ буоллар.
***
Ити курдук Чурапчыттан Аллараа Бэстээххэ диэри автобус сылдьарын дьон эрэнэ күүтэр. Онон автобустар сырыылара үтүө аргыстаах буоллун.
Вилена СТРУЧКОВА, Чурапчы гимназиятын пресс-киинин юнкора.
Ааптар хаартыскаҕа түһэриитэ