Эҥэ нэһилиэгэр үөрүүлээх күн буолла. Саҥа тутуллуохтаах оскуолабыт бастакы сыбаайата түстэ. Онон бары сүргэбит көтөҕүлүннэ.
Оскуолата суох сылдьыбыппыт хас да сыл буолла. Билигин кып-кыра оскуолаҕа симиллэн олоробут, онно баппакка, хас да сиринэн үөрэнэбит. Биһиги оскуоланы бүтэриэхпитигэр диэри оскуола бүтэрэ буоллар, биһиги саҥа оскуола выпускниктара буолуо этибит.
Бу үөрүүбүтүн оройуон баһылыга В.М. Иванов, үөрэх управлениетын салайааччыта И.С. Юмшанов үллэһиннилэр. Кинилэр оскуола тутулларыгар эрэллэрин эттилэр.
Уран тыллаах алгысчыт Василий Колесов арчылаата, алгыстаата. Бары саҥа оскуолаламмыт саҕа сананан тарҕастыбыт, ол кэнниттэн кэнсиэрдээтибит.
Ити курдук биир бэлиэ күн буолан ааста.
Снежана Бурцева,9 кылаас, Эҥэ,»Саһарҕа» пост.