Бүгүн, олунньу 22 күнүгэр, Харбалаахтааҕы үөрэхтээһин холбоһугар Аҕа дойдуну көмүскээччилэр күннэригэр аналлаах алын сүһүөх кылаас үөрэнээччилэригэр «Смотр строя и песни» тэрээһин үрдүк таһымҥа ааста.
Кырачаан саллааттар бу тэрээһиҥҥэ бэлэмнэнэн, оскуола иһин ылан кэбиспиттэрэ ыраатта. Ол түмүгэр, бүгүн олус бэрт хаамыыны көрдүбүт, ырыаны ырыалары иһиттибит. Чобуо куоластаах хамандыырдар араапар биэрэн чоргуйдулар, кылаастарын хамаандалаан хаамтардылар.
Күрэхтэһии түмүгэр 4 кылаастар маҥнайгы миэстэни ыллылар, учууталлара С.Р. Винокурова. Иккис миэстэни үчүгэй бэлэмнээх маҥнайгы кылаастар ылан, үөрүү бөҕө буоллулар, учууталлара М.С. Попова. Үһүс миэстэни үһүстэр ыллылар, учууталлара К.И. Старостина. 2 кылаастар «Көхтөөхтүк кыттыы иһин» анал бэлиэни туттулар, учууталлара Т.С. Севастьянова.
Итини таһынан, «Лучшая строевая подготовка» анал ааты 4 кылаастар ыллылар. «Бастыҥ хамандыыр» аатын Эрчимэн Ананьев,1 кылаас үөрэнээччитэ ылан улахан кылаас хамандыырдарыгар холобур буолла. Үһүстэр «Бастыҥ байыаннай ырыа» номинация кыайыылаахтара буоллулар. «Бастыҥ байыаннай формалаахтарынан» иккистэр ааттаннылар.
Салгыы араас саастаахтартан таҥыллыбыт «Күөхтэр», «Араҕастар», «От күөхтэр», «Кыһыллар» хамаандалар икки ардыларыгар көрдөөх эстафета ыытылынна. «Кыһыллар» хамаандалара кыайыы өрөгөйүн биллэ.
Бу күрэхтэһиигэ улахаттар кыраларыгар өйөбүл буоллулар, олус көхтөөх эстафета доҕордуу буолуу, көмөлөсүһүү иэйиитигэр куустаран түмүктэннэ.
Наташа Никифорова, 11 кылаас үөрэнээччитэ, Харбалаах үөрэхтээһин холбоһуга.