Сайын буолан, үөрэх дьыла түмүктэнэн, оҕо уонна төрөппүт сайыҥҥы сынньалаҥы саныыр, баччалаах үтүө кэми хайдах көдьүүстээхтик атаарар туһунан толкуйдуур. Ханнык лааҕырга, ханна сынньана барыахха диэн үгүс оҕо, төрөппүт долгуйар ыйытыыларыгар Вера Васильевна ФЕДОРОВА, Үөрэх министиэристибэтин иһинэн иитии, эбии үөрэхтээһин салаатын сүрүн специалиһа хоруйдуур:
– Өрөспүүбүлүкэ үрдүнэн быйыл сайын үлэлиэхтээх лааҕырдар испииһэктэрин: саха-отдых-детей.рф саайтка көрүҥ. Барыта 680 тэрилтэ оҕо сайыҥҥы сынньалаҥын тэрийиигэ, доруобуйатын чэбдигирдиигэ үлэлиир. Маныаха эһиги биири өйдүөхтээххит: талар лааҕыргыт кэтиир-маныыр уорганнар бэрэбиэркэлэрин ааспыт, анал лицензиялаах, көҥүллээх буолуохтаах. Итинник бары ирдэбиллэри толору ааспыт лааҕырдар испииһэктэрэ ити үөһэ ыйыллыбыт саайтка баар.
Краснодарскайга
– Үөрэх министиэристибэтэ Краснодарскай кыраай Туапсе оройуонугар баар «Золотой колос» лааҕырга 800 оҕону ыытарга былаанныыр. Биир симиэнэ 21 күннээх. Путевка сыаната 18500 солк. Сөмөлүөтүнэн көтөргө субсидиялаах билиэт көрүллэр.
Интэриэһиргээбит дьон 8-924-766-07-20 төлөпүөнүнэн эрийэн билсиҥ, centerINIT@mail.ru электроннай аадырыска суруйуҥ.
5000-7434 солкуобайга диэри
– Чэпчэтиилээх путевкалары ылан (быһа барыллаан 5000-7434 солк.), «Сосновый бор» Киин араас симиэнэлэригэр, «Чэбдик», «Дружба», «Чэчир», «Смена» лааҕырдарга сынньана, чэбдигирэ киириэххитин сөп. Онно 3000 кэриҥэ оҕо сынньанара күүтүллэр.
Сайаапкалары кулун тутартан ылбыттара, онон сорох симиэнэҕэ миэстэлэрэ толору буолуон сөп. Ити эрээри, «Сосновый бор» 8-924-868-70-11, 8-924-868-72-68sb_ykt@mail.ru, «Чэбдик», «Дружба», «Чэчир», «Смена» sakhaleto@mail.ru ыйыталаһыҥ, суруйуҥ.
Куорат лааҕырдарыгар
– Куорат лааҕырдарыгар өрөспүүбүлүкэттэн ким баҕалаах эмиэ сылдьыан сөп. «Бинго», «Спутник», «Родничок», «Радуга», «Каландаришвили» лааҕырдарга, куорат үөрэххэ управлениетын кытары сөбүлэҥ түһэрсэн, киириэххитин сөп. Чэпчэтиилээх путевкалар 8000-11500 солк. Өскөтүн лааҕырдарга путевкалары чэпчэтиитэ суох бэйэҕит ылбыт буоллаххытына, 15813 солк. анал сайаапканан төннөрүллэр.
Билсэр төлөпүөҥҥүт:
8-924-868-72-68.
Үөрэх киинэ диэн атын
– Дьиҥэр, күнүскү лааҕыр барыта лааҕыр диэн ааттаммат. Үгүстэрэ күнүскү үөрэх Киинэ буолаллар. Онон оҕону лааҕырга киллэриэх, олохтуох иннинэ, хайаан да докумуоннарын, лицензияларын ыйыталаһыҥ, ирдээҥ. Барыта СанПиН нуорматыгар эппиэттэһиэхтээх.
Холобур, үөрэтэр аналлаах күнүскү лааҕыры ылыахха. Манна үөрэх хайысхатынан дьарыктаналларыгар көҥүллээх, лицензиялаах буолуохтаахтар. Онон, бука баһаалыста, саха-отдых-детей.рф саайты көрүҥ, туһаныҥ, эһиги олорор сиргитигэр, улуускутугар ханнык сайыҥҥы лааҕыр баарын көрөн, бэйэҕит талыҥ.
***
Интэриниэккэ, социальнай ситимнэргэ араас хайысхалаах лааҕырдар үлэлииллэрин туһунан биллэрии эгэлгэтэ элэҥниир. Ити эрээри, бары докумуоннаахтар СанПиН ирдэбилигэр эппиэттииллэр дуо? Былырыын сайын үлүбээй, харчы эрэ ыла сатыыр лааҕырга алҕаска суруйтаран баран… күннэрин да толору туһаммакка, харчыларын тыалга көтүппүт, албыннаппыт төрөппүттэри көрсүбүтүм. «Бассаабынан лааҕыр арыйабыт диэн ыҥыр да ыҥыр, суруй да суруй. Оҕобут наһаа баҕарарын иһин, ыйыллыбыт сууманы төлөөбүппүт, оҕобут сылдьан барбыта. Ол эрээри, лааҕыр сотору сабыллыбыта, оттон биһиги харчыбытын төннөрбөтөхтөрө. Харчы атын бырайыакка туттуллубут диэн буолбута… Онон, төрөппүттэр, үлүбээй, «лааҕыр» диэн аатыгар эрэ ааттанар кииннэргэ оҕолоргутун мээнэ биэримэҥ. Докумуоннарын, лицензияларын ирдиир буолуҥ. Бассаап сонунун итэҕэйимэҥ».
Жанна ЛЕОНТЬЕВА.
Василий ПАК
түһэриилэрэ.