Гражданскай сэрии дьоруойун Кеша Алексеев аатын сүгэр Хаптаҕай оскуолатын туйгун үөрэнээччитэ, бастыҥ актыбыыһа, дэгиттэр дьоҕурдаах Алена Афанасьева Сахабыт өрөспүүбүлүкэтин Ил Дарханын Харыйатыгар делегат буолан кыттан кэллэ.
Алена бастакы кылаастан наар туйгун сыанаҕа үөрэнэр. Оскуола бары тэрээһиннэригэр актыыбынайдык кыттар уонна оскуолабыт «Пульс» оҕо тэрилтэтин чилиэнэ буолан тэрийсэр. Элбэх идеялардаах, киэҥ толкуйдаах буолан, Алена куруук инники күөҥҥэ сылдьар, оскуола үөрэнээччилэрин убаастабылларынан туһанар.
Туйгун үөрэнээччи араас таһымнаах олимпиадалар кыайыылаахтара, ол курдук нуучча, саха тылларыгар уонна литературатыгар улууска, экономикаҕа — 1 миэстэ, өрөспүүбүлүкэҕэ — 3 миэстэ, «Слава в руках труда», «В начале было слово..» викторина, өйтөн суруйуу научнай ааҕыыларга –Новгородовскай ааҕыылар «Человек славен трудом», «Мода и дизайн», оскуола, улуус брейн-ринг оонньуу бастыҥ оонньооччута анал ааттардаах.
Үөрэх, билии көрүҥнэрин таһынан, кыра кылаастан үҥкүүнэн утумнаахтык дьарыктанар — «Кэрэ эйгэ ыллыгынан», «Танцевальный микс», «Карусель», «Танцевальная комбинация по терминам джаза», «Күндүл» сольнай, пааранан үҥкүү күрэхтэрин лауреаттара, дипломаннара. Ону таһынан, Алена быыс булан иистэнэр.
Декоративно-прикладной үлэлэр быыстапкаларын кыттыылааҕа, «Оһуор мандар» түһүлгэ, «Академия талантов», В.К. Степанов аатынан култуура, спорт 64 эстафетатын кыайыылааҕа. Өрөспүүбүлүкэтээҕи «Эргиэн» оонньуу кыайыылааҕа буолан, «Океан» лааҕырга путевканан наҕараадаламмыта. «Океан» лааҕыр актыыбыгар үлэтин иһин, советник дипломнарын ылбыта. Үөрэх бастыҥа Алена сорох ситиһиилэрин аахтахха маннык. Ол да иһин оскуола педсовета, оҕолор, төрөппүттэр кинини биир санаанан таланнар, Ил Дархан Харыйатыгар тиксэр чиэскэ тигистэҕэ.
Алена Ил Дархан Харыйатын туһунан маннык кэпсээтэ:
— Мин Мэҥэ-Хаҥалас улууһун 39 делегаттарын састаабыгар киирэн, ахсынньы 23 күнүгэр куоракка айаннаабыппыт. Мэҥэлэр өрөспүүбүлүкэтээҕи лицей уопсайыгар түспүппүт. Тиийбит күммүтүгэр «Мы будущее России» форумҥа кыттыбыппыт, салгыы лицей физика учууталын В.Ф. Потаповы кытары көрсүһүү буолбута. Бу көрсүһүүгэ үөрэнээччилэрэ учууталларын үрдүк наҕарааданан эҕэрдэлээбиттэрэ, көрсүһүүгэ куорат аҕа баһылыга Е.Н. Григорьев кыттыыны ылбыта.
Онтон 24 чыыһылаҕа циркаҕа Ил Дархан Харыйата олус интэриэһинэйдик, долгутуулаахтык буолбута. Олус үчүгэй саҥа дьыллааҕы көрдөрүүнү көрдүбүт, өрөспүүбүлүкэбит Ил Дарханын Айсен Сергеевич этиитин иһиттибит. Өрөспүүбүлүкэ оскуолаларыттан кэлбит үөрэнээччилэр бары үөрэн-көтөн, долгуйан, олус астынныбыт.
Бу курдук олоххо биирдэ бэриллэр Ил Дархан Харыйатыгар путевка биэрэн сырыттыннарбыт оскуолам бары учууталларыгар, бииргэ алтыһар оҕолорбор, төрөппүттэргэ махталым муҥура суох. Барыгытын кэлэн иһэр саҥа 2023 сылынан эҕэрдэлиибин, ситиһиини, этэҥҥэ буолууну, эйэлээх олоҕу баҕарабын!
«Кустук» медиастудия, Хаптаҕай орто оскуолата.