В.М. Новиков-Күннүк Уурастыырап аатынан Эмис орто оскуолатын 11 кылааһын үөрэнээччитэ Даша Чемезова быйыл Ил Дархан харыйатыгар барарга көҥүл ылан үөрдэ-көттө.
Даша алын кылаастан кэккэ ситиһиилэрдээх, оскуола биир бастыҥ үөрэнээччитэ, актыбыыс, спортсмен. Кини чэпчэки атлетикаҕа, волейболга, баскетболга элбэх күрэхтэһиигэ, биирдиилээн бастыыр иһин кыттан кыайыы кынаттаммыта.
— Мин хас да төгүл улуустааҕы ВОШ физкультура олимпиадатын призерабын, кыраайы үөрэтэр НПК уонна “Инникигэ хардыы” кэмпириэнсийэ дипломанабын. Оскуола иһинэн тэриллэн үлэлиир “Добун” байыаннай-патриотическай кулуупка дьарыктанан, араас таһымнаах күрэхтэргэ кыттабын. 2019 сыллаахха өрөспүүбүлүкэтээҕи “Байанай” күрэҕэр бастакы миэстэ буолбуппут. Быйыл бу күрэх улуустааҕы түһүмэҕэр иккис миэстэ буолбуппут.
Ил Дархан Харыйатыгар кыттарым мин олохпор улахан суолталаах, манна үгүс оҕолору кытта билсиэм, бириэмэбин олус үчүгэйдик атаарыам диэн эрэнэбин, — диэн биһиэхэ кэпсээтэ өрөспүүбүлүкэ бастыҥ үөрэнээччилэриттэн биирдэстэрэ Даша Чемезова.
«Кэскил» медиа-киин, Эмис оскуолата,
Амма улууһа.