Ахсынньы 3 күнүгэр Майа сэлиэнньэтигэр улуустааҕы «Саха КВН» күрэҕэ буолан ааста. Онно Чыамайыкыттан «Чиккэстэр» Анна Петровна Жиркова салайааччылаах хамаанда олус үчүгэйдик кыттан кэллибит.
Хамаандабытыгар уопсайа 8 оҕо уонна 2 улахан киһи күүскэ үлэлэстилэр. Бары олус түмсүүлээхтик хамсанаммыт, күн аайы ханнык да күнү көтүппэккэ, кими даҕаны туора турбакка, көхтөөхтүк кыттыыны ыллыбыт. Үөрэх кэнниттэн уонна киэһэ кулууппутугар кэлэммит бэлэмнэнэр этибит. Бары наар үөрэ-көтө сылдьан бэлэмнэнэрбит олус астык этэ, ким даҕаны сылайбат этэ.
Ол курдук күрэхтэһиибит буолуон күнүн иннигэр оскуолабыт үөрэнээччилэригэр, учууталларыгар нүөмэрдэрбитин көрдөрбүппүт. Онон бу күн КВН «Чиккэстэр» хамаанда бастакы дьоҥҥо тахсыбыт күммүтүнэн ааҕыллыан сөп. Көрөөччүлэр бары сөбүлээн, хайҕаан, санааларын этэн, биһиги өссө үчүгэй буоларбытыгар улахан кылаат киллэрбиттэрэ.
Дьэ, уонна сарсыарда эрдэ тураммыт уһун айаны айаннаан күүтүүлээх күрэхпитигэр тиийэн кэллибит. Күрэхтэһиигэ уопсайа 5 оскуола хамаандата кыттыыны ылбыта: Павловскайдар, В.П. Ларионов аатынан Майа орто оскуолата, Сыымахтар, Аллараа Бэстээх 2 N-дээх оскуолата уонна биһиги. Аан бастаан эрэдээксийэгэ киирэммит дьүүллүүр сүбэҕэ нүөмэрдэрбитин көрдөрөн сыыһаларбытын көннөрүнэн тахсыбыппыт.
Долгутуулаах оонньуубут саҕаланна. Бастаан бэйэни билиһиннэрии диэн түһүмэх түмүгүнэн биһиги иккис буолбуппут. Онтон иккис түһүмэх «Биатлон» саҕаланна. Манна хамаандаттан биирдии киһи тахсан көрүдьүөстэри кэпсиир. Хас эргиир аайы биирдии киһи туораан иһэр. Бу түһүмэххэ биһиги кыайдыбыт. Ол кэнниттэн бүтэһик түһүмэх «Музыкальнай дьиэҕэ үлэ» диэн буолбута. Онно эмиэ биһиги бастаабыппыт.
Бары улаханныын кыралыын олус долгуйа түмүкпүтүн күүтэр кэммитигэр «Мэҥэ кэскилэ» уонна «Ларионовцы» диэн оҕо түмсүүлэрин актыбыыстара оҕолорго Доҕордоһуу түһүлгэтин тэрийбиттэрэ.
Бу тэрээһин түмүгүнэн «Мистер КВН» диэн ааты В.П. Ларионов аатынан Майа орто оскуолатын 10 кылааһын үөрэнээччитэ Слава Тарскай сүктэ. Оттон «Мисс КВН» Аллараа Бэстээх 2 №дээх оскуолатын үөрэнээччитэ Альмира Брызгалова буолла.
Биһиги, Чыамайыкы «Чиккэстэрэ», «Бастыҥ дьиэтээҕи сорудах» диэн номинацияҕа тигистибит.
«Бастыҥ көрүдьүөс» диэн номинацияны Павловскайтан «Муокастар» ыллылар.
«Бастыҥ эҕэрдэлэһии» диэн номинацияны В.П. Ларионов аатынан Майа орто оскуолатын «Мэник Мэҥэлэр» хамаандата ылла. «Мэкчиргэ мэйии» номинация Сыымахтан «B.I.T-тар» хамаандаҕа тигистэ. «Саха КВН эрэлэ» номинацияны Аллараа Бэстээхтэн «Two School» хамаанда ыллылар.
Уопсай түмүккэ бочуоттаах 3 миэстэни Павловскайтан «Муокастар» хамаанда ылла. 2 миэстэҕэ В.П. Ларионов аатынан Майа орто оскуолатын «Мэник Мэҥэлэр» хамаандата таҕыста. Уонна 1 миэстэ буолары Чыамайыкыттан «Чиккэстэр» хамаанда ситистибит!
5000 сууммалаах сертификатынан, кубогынан наҕараадаланныбыт уонна саас улуус чиэһин көмүскүү барар чиэскэ тигистибит.
Махталбытын тиэрдиэ этибит биһиги тапталлаах салайааччыларбытыгар Анна Петровнаҕа, Ньургуйаана Гаврильевнаҕа уонна биһигини өйөөбүт дьоҥҥо.
Сайаана Захарова, 10 кылаас үөрэнээччитэ, «Проба пера» эдэр корреспондена, Чыамайыкы Мэҥэ-Хаҥалас.